Aizawl: Food, Civil Supplies & Consumer Affairs (FCS&CA) department thawktute chuan ration card leh Aadhaar card thlunzawm tawh zat chu ration card awm zawng zawng atanga chhutin zaa 78.33 a ni tih an sawi. FCS&CA department thawktuten Zalen an hrilh danin Mizorama ration card zawng zawng hi 2,66,878 a ni a, hemi zinga 2,09,062 chu Aadhaar nen thlunzawm tawh a ni a, heti hian zaa 78.33 thlunzawm tawh an ni. Ration card-a hming chuang (beneficiaries) zawng zawng hi mi 12,64,857 an ni a, an zinga 7,10,583 chu Aadhaar nen thlunzawm tawh an ni a, heti hian beficiary-te bikah chuan zaa 56.17 thlunzawm tawh an ni. FCS&CA department hnuaia district office hrang hrang hi hmun 9-ah then a ni, Aizawl bik chu East leh West-ah then a ni. Hemi zingah hian ration card thlunzawm tawh thatna ber chu Aizawl West niin zaa 96 thlunzawm tawh a ni a, Lawngtlaiah tlem berin zaa 53 thlunzawm tawh a ni. Ration card-a hming chuang, beneficiary-ah chuan Serchhip district chu thlunzawm thatna ber a ni a, zaa 74 thlunzawm an ni a, a chhiatna ber chu Lawngtlai niin zaa 32 thlunzawm tawh a ni. FCS&CA hotute chuan tunlaiin thil hrang hrangah Aadhaar thlunzawm chu tih ngei ngei tur (mandatory) a ni lo e tiin thupek chhuah a ni a, nimahsela hei hian Public Distribution System (PDS) a huam lo niin an sawi. Aadhaar leh ration card thlunzawm hna thawh mekah hian thingtlang hmun thenkhatah internet a that tawk loh avangin hna thawh chak a harsa niin FCS&CA hotute chuan an sawi a, a then ngai pawimawh lo hrim hrim an la tam niin an sawi a. Aadhaar nei lo pawh an la tam tih sawiin FCS&CA hotute chuan central atanga hmanhmawh tura nawrna na dawn ve reng avangin GAD lam pawh theih ang angin an Aadhaar siam chak turin an nawr ve niin an sawi bawk.