Aizawl September 8, 2024 : Tun lai hian veng/khaw hrang hrangah ration card en that mek a ni a, veng tam zawk chuan an zo tawh a. Card var (Non FSA), Card pawl (PHH) leh Card eng (AAY) list hi mipui hmuh theiha tar tura sawrkarin a tih angin hmun ualau laiah tar a ni.

FCS&CA department ruahman dan chuan ration card ennawn mek hi final hmain a list hi veng chhungah a duh apiang tana en theih leh complaint theiha tar chhuah tur a ni a, a tlem berah kar khat chhung tar chhuah tur a ni ang.

Tar chhuahna hmun hi hmun ualau, a duh apiangte hmuh theihna hmun a ni tur a ni a. Veng chhung chanchinbu-ah tar chhuah a nih thu hi chhuah vek bawk tur a ni a, chutiang ti lo vengte chu an hmalakna pawmsak an ni dawn lo.

Lungawi lo chuan ziakin DCSO-ah theh luh theih a ni a. En that hna buaipuitu ‘selection committee’ chairman hi DCSO a ni a, local council chairman chu vice chairman tur niin secretary-ah YMA aiawh tur an ni a. Member-ah local council, MHIP leh MUP aiawh an ni a; mahse, CYMA-in inrawlh lo tura a rel avangin YMA an tel lo a, MUP leh MHIP aiawhte an tel.

Ruahmanna hmasaah chuan thlan chhuahte list hi August 20, 2024 aia tlai lovah DCSO-ah thehluh vek tur a ni a; mahse, buaipui ngai a tam avangin thehluh hun hi pawhsei a ni.

Food, Civil Supplies & Consumer Affairs department chuan October atangin Mizoram sawrkarin ration card var neitute tan buhfai kg khata subsidy Rs. 25 sawrkarin a pek thin chu Rs. 10-ah ti hniamin card var hmangtuten Rs. 15 a an khul thin chu Rs. 30-in an khul tawh dawn.

Hei vang hian sawrkarin thla tin Rs. 5,25,93,072 humin kum khatah Rs. 63,11,16,864 a hum thei dawn niin an sawi a. Mizoramah ration card nei chhungkua 2,88,757 awmin, mihring 11,72,378 a huam a ni.