Aizawl September 9, 2024 : Vawiin khan ZPM Party Office-ah chhung inkhawm hun hman a ni a, thusawitu Supply Minister B. Lalchhanzova chuan, “Retheite ngaihsaktu party kan nihna hi Ration Card kan thlanna hmang hian lantir kan tum a, ngaihsaktu nei ve loten rei tak atanga ZPM min lo nghahna chhan pawh a ni,” a ti. MNF Local Council te an rintawk thu a sawi bawk.

Food Civil Supply & Consumer Affairs Minister B Lalchhanzova chuan Aizawl khawpui chhunga Ration Card awm zat leh Card Eng, Card Pawl leh Card Var dinhmun sawi a , "Tunah hian Aizawla veng 83-ah Retailer 153 an awm mek a, Food Security Committee-ten an zirchiang ang a, keinin DCSO kaltlangin Food Security Committee-te an dik tawk em tih kan lo zirchiang leh dawn a ni. Mi rethei hlamchhiah an awm em tih chu kan thupui ber a ni dawn a, a titha lo veng an awm em tihte thlengin kan lo enfiah dawn a, a teh dan tur pawh kan duangfel vek tawh a ni," a ti.

"Ti tha lo veng leh titha vengte pawh kan puang hial mai thei a ni. Rethei ngaihsaktu party kan nihna hi he Ration Card kan thlanna hmang hian lantir kan tum a, ngaihsaktu nei ve loten ZPM rei tak atanga min lo nghahna chhanna tur a ni," a ti bawk.

Retailer lawman chungchang sawiin, "Pawisa 50 atangin Rs.1.50-ah kan tisang dawn a, Aizawl bikah chuan hei hi October atangin tan hman kan tum. Retailer ten an buk dik tur a ni a, buk dik zalenna ram nih kan tum," a ti.

Chhanzova chuan, “ India ram sawrkarin kum 2011 chhiarna angin Mizorama chhungkua 7,06,296 te Food Security hnuaiah min rinlut. Aizawl khawpui chhungah card var nei si mirethei tak tak, an awm avangin Food Security Committee kaltlangin endik hna a kalpui a, kan tum ber chu mi awm theite leh mahni khamkhawp buhfai ei theite buaipui lam ni lovin mirethei, sawipuitu nei lo, an chanvo tur ang chang pha lo te hmaih palh an awm ang tih kan hlau a, chu chu kan thupui ber a ni," a ti.

"National Food Security Committee an din tawh pakhatmah ti danglam lovin hma kan la mek a, chuta buaipuitu tam ber 90% chuang chu MNF Local Council-te an ni. Mi tam tak chuan Local Council thlan that a nih hnuahte ennnawn chauh awm an ti hlawm. Mahse kalphung tharah chuan MNF local Council pawh nise kan ring ngam a, an harh thar ve turah pawh kan ngai," tiin Card chi hrang te chu a neitu awm tak zelin an neih tur thu a sawi bawk.

Chief Minister hmalaknain Non-NFSA hnuaia luh belh theih nan Union Minister Pralhad Joshi pawh a chennain te ka zuk hmuh thu sawiin, "Min lo nghak ru a tih angin beiseina sang tak kan nei a ni,” a ti.