Aizawl: Food, Civil Supply & Consumer Affairs Department in Ration Card computerised hna an thawh mek chu a thawh khatna (component I) an zo tawh a, a hmaa Ration card ah Mizoram mipui nuai 15 vel awm thin chu nuai 12 ah a tla thla a, a hma aia mihring an tlemna hi nuai 3 vel a ni. FCS&CA Department hian Ration Card, computer a thunluh hna ‘End to End Computerisation of TDPS’ chu an thawk zo tawh a, mahse a taka thil kalpui tak tak tur chuan central lam nen thlunzawm a ngai a, thlunzawm hna thawk tur hian National Informatics Centre (NIC) chuan an buaipui mek a, hei hi zawh anih hun chuan a taka thil kalpui theih a ni tawh dawn a ni. Kum 2011 chhiarpui khan Mizoram ah mihring nuai 10 chuang deuh an awm laiin Ration Card ah chuan mihring nuai 15 vel awm ang a ni a. Tun tuma siamthat hna thawh mekah hian mihring nuai 12 vel an awm a, hei a dik tawkah FCS&CA Department chuan an ngai. FCS&CA thawktute chuan, "Kum 2011 chhiarpui leh tun inkara mihring pun dan chhut in a dik tawk turah kan ngai a. Mi tam tak chhiarpui aiin Ration Card ngai pawimawh zawk an awm avangin kan data hi a dik tawk hle turah kan ngai a ni," tiin Zalen an hrilh.