ZALEN November 14, 2024 : MPCC Treasurer Dr. Lalmalsawma Nghaka chuan, “Zoram dung leh vang ka fang mek a, ZPM-a rinna nghat te an hnual hmel ka hmu zel. Ration buhfai lakna tur tuaka rum hmel ka hmuhte hian hreawm ka ti. Mipui mimirin kawl eng an hmuh theih nan Congress hi a sawrkar leh a ngai a, inpe lehzual turin Congress hruaitute ka sawm che u a ni,” a ti.

Aizawl South II Block Congress Committee hruaitu thar inhmelhriat tawnna an neihnaah Dr. Mala chuan, “ZPM hi sum enkawlna lamah a hlawhchham tan der tih a lang. Kan Chief Minister zahawm tak Pu Lalduhoma, Bhavan ka lilam ang titu hian Zoram hi a hralh hreh lovang tih a langchiang ta hle, ram rotling hralh an tum thawm hi a ring hle a nih hi! Sawrkar hmasa zawk ten felfai tak leh ZPM rawn sawrkar hma thlenga an enkawl theihte kha, kan sawrkar hian phurrit a ni tiin, vai sumdawng hausa te hnenah hlan an tum thawm chi hrang hrang a ri nasa ta hle," a ti.

MPCC Teasurer chuan, “Congress sawrkar laiin kan hotuten an intiam angin chhungkaw 140736 hnenah NLUP hmangin an dinhmun chawikanna turin tanpuina pek an ni a. BANA KAIH Policy hmangin ZPM Sawrkar hian Mizoram chhungkaw engzat dinhmun ngei a chawi kan ve dawn tih hi kan thlir reng a ni. MNF sawrkarin an intiamna an ti hlawhtling thei lova, SEDP ah an intiam zat an pe thei lo ang khan ZPM Sawrkar hian mipuite a ti beidawng leh ang tih a hlauhawm hle,” a ti bawk.