February 15, 2023; Chief minister Zoramthanga'n raw material tam tawk loh vangin Mizoramah Bamboo Industry a kal hlei thei lo niin a sawi a, chung zingah chuan Venus Bamboo Products (P) Ltd pawh a tel tih a sawi.
 
Vawiin Assembly Budget session zawhna leh chhanna hunah member te zawhna sawifiahin, chief minister chuan sawrkar leh mimal in Bamboo Industry an siam tih tarlangin, thil tihfuh chiah loh erawh an nei niin a sawi.

"Raw material supply a lokal tam thei lo a, chu chu link road awm loh vangte a ni," tiin, "Mizoram ah Mau leh Rua tam tak awm mahse, a te a, a lian tha lak a harsa sa a, a awmchhun a to bawk si a, chumi vang chuan khawl tha tak pawh awm mahse, kawng dang a kalpui a nih loh chuan siam tur raw material a tam tawk loh avangin, Bamboo Industry te a kal hlei thei ta lo a ni," a ti.