Real Madrid hi khawvel football club lian leh hmingthang ber pawl an ni a, a hausa ber pawh a ni hial mai thei. Tun hma deuh phei kha chuan an player lei duh leh awh zawng chu man to mah se an hlah ngai meuh lo.  

Team tha tak din turin manto tak takin player an lei khawm a, lei fuh fe fe an neih rualin tihsual deuh pawh an nei fo mai. Tun tumah hian an player lei fuh zual kan tarlang dawn a ni. 
Kum 20 kalta chhunga Real Madrid transfer tha ber ber 6 te chu heng mite hi an ni.

Luis Figo - €62m (Barca, 2000)

Club inhal tak an nih vangin Barcelona atanga Real Madrid-a pan hi an vang khawp a, lar vanglai taka inlei phei chu thil thleng khat a ni. Figo hian ngaihtuahna dang a nei a, a duhthlanna a kalpui ngam. 

A vanglai takin World record fee-in Portuguese winger Figo chuan Barca atangin Real a zawm a, hetih hunlaia lei chhuaktu chu Florentino Perez a ni. 

Figo hian game 164 khelhah goal 37 a khung a, Ballon d’Or erawh a hlawh chhuak zo lo. Player langsar Zinedine Zidane leh Ronaldo te pawhin an hliah khuh mai thei bik lo va, Figo hi kum tam tak chhung an squad member pawimawh a ni. 

Zinedine Zidane - €77.5m (Juventus, 2001) 

World Cup leh European Championship-a France  champion puitu Zidane chuan Juventus atangin world record fee-in Los Blancos a zawm a, team tlakhniam lai takin a talent hmangin Zidane hian kum nga chhung zet chu club-a awi nung a, legend tih ngam khawpin a dinhmun a siam rem hman. 

Sergio Ramos - €27m (Sevilla, 2005) 

Ramos hi Real Madrid-in an lakluh tawh zinga ropui ber pawl a ni hial ang. Spanish defender  record ni turin kum 2005 khan Sevilla aṭangin €27 million-in an lalut a, a transfer fee chu a let tam takin Los Blancos tan hian a rul a tih ngam. Kum 2021 khan free agent-in Paris Saint-Germain a pan.

Defender ni chungin Ramos hian Madrid tan goal 101 teh meuh a khung hman. Bernabeu icon tih lo rual a ni lo. Club chanchinah, match 671 aia tam player pathum chiahin an khel a, chung zinga pakhat Ramos hian Real Madrid-a club chawimawina lian tham zawng zawng vawi tam a dawng thei a, Champions League title tum 4 a chawi pui tawh bawk.

Karim Benzema - €35m (Lyon, 2009) 

Benzema-a’n Lyon a zawm tirh khan a mitthla chu Real lam daih a ni. Kum 2009 khan Real Madrid chuan forward naupang beisei awm tak hi €35 million-in an lalut a, a kum leh a thiamna enin chutih lai chuan hei hi fee lian tham tak a nih bakah risk liau liau a ni. Mahse kum sawm hnuah chuan tunnge a nih kan hriat tak hi.

Hun rei tak chhung chu Cristiano Ronaldo vangin Benzema nihna tak hi hriat a ni lo va, starting XI pawh chang hleitheilo kha a ni a, mahse Ronaldo-a’n Juventus a pan hnuah Madrid star ropui a rawn ni ta. Tunah chuan Real Madrid tana goal khung tam ber pahnihna ni tawhin goal 300 chuang a khung tawh a ni. 

Cristiano Ronaldo - €94m (Man United, 2009) 

Manchester United-a talent nei tha ber Ronaldo chu 2009 khan Spanish club lian hian an lei chhuak a, chu hmunah chuan football history tam tak a siam ta bawk a ni.         

Santiago Bernabeu-ah hian a tlangtla hle a, La Liga - 2, Champions League - 4, Copa del Rey - 2 leh Club World Cup - 3 a chawi pui hman a ni. 

Goal khungtu ropui hi Real Madrid chanchina goal khung hnem ber a ni a, a vanglai leh Lionel Messi vanglai hi in nang fuh hlauh lo phei seng chuan, a hmingthan dan tur chu sawiin a siak lo hial zawk ang. 

Luka Modric - €34m (Tottenham, 2012)

2012 khan beiseina sang tak nen Modric hi Santiago Bernabeu lamah lakluh a ni a, a season hmasa berah bul a tan chhiat em vangin Marca chanchinbu chuan season khat chhung-a player lakluh chhe berah an thlang hial.

Mahse, hun a kal deuha Modric-a thiamna a rawn lang chho zel a, khawvel-a midfielder ṭha ber pawlah indin chhoin, amah vangin Real chu khawvel-a club tha ber tia hialin an chhal phah ta fo mai. 

Kum 2018 khan World Cup-ah a ram Croatia tan leh a club tan ropui takin a par a, Messi leh Ronaldo vanglai takin Ballon d’Or a dawng nalh thei hian tunge a nih chu a hril chiang mai awm e.