Aizawl; Mizoram sawrkar chuan Tripura a khawsa mek Reang (Bru) chhungkua 494 Mizorama lalet turin ruahmanna a kalpui mek a, heng mite hi uluk taka enfiah an nih hnuah Mizoram khua leh tui dik tak an ni tih fianfiah an ni. ZALEN palaiin Mamit DC office a, Bru Repatriation Cell thawktute hnen atanga thu a dawn danin Reang (Bru) chhungkua 669 Mizorama hruaikir nan pawisa sanction a ni a, hei hi Mamit DC office chuan an bawhzui nghal a. Tripura transit camp hmun hrang hrangah official te intirin electoral roll hmangin finfiah an ni a, tunah chhungkaw 494 te hi tihchian phawt an ni a, a dang enfiah hna pawh chhunzawm zel tum a ni. Tripura a khawsa mek Reang (Bru) te Mizoram a hruaikir hna hi tum 5 neih a lo ni tawh a, a tum 6 na atana hruaikir leh turin ruahmanna kalpui mek a ni a. A hun leh ni tak chu naktip Thawhlehni a Chief Secretary hova state level meeting neih hunah tihchian a ni dawn a, Mamit district chu engtik lai pawha Reang (Bru) te hruaikir tur hian an inpeih tawh a, sawrkar hmalakna an ngaichang mek a ni. Mamit DC office, Bru Repatriation Cell a nodal officer K.Zorammuana chuan tuna Reang (Bru) lolet tur te chu an awmna thin bial (constituency) ah dah leh vek an tum tih a sawi a, mahse khaw tam tak chu ruahsan anih tawh avang leh khaw thenkhat ah inhmun pekna tur hmun a awm remchanloh avangin khaw danga sawn ngai pawh an awm dawn niin a sawi a. Reang (Bru) zingah Mizoram a let duhlo an awm thu official chuan an hrelo tih a sawi bawk. Tunlaia sawrkar hnathawk thenkhat, ramri bula awmte an thlabar nia sawi chungchangah K.Zorammuana chuan Reang (Bru) hnen atangin vauna dawng an awm an hrelo tih a sawi a. Mahse repatriation dawnin mi thenkhat tihbuai tum an awm thin avangin Police ten fimkhur thuhla ah inralring turin ramri bula awmte an hriattir mai a ni, a ti a. Tuna tlanchhe ho chu a bikin zirtirtu an ni tih a sawi bawk. Reang (Bru) lolet tur te hi In leh lo an dinnan chhungkaw khat ah Rs. 80,000 theuh bakah Mizoram an lo kir kawnga an motor hman man atan Rs. 5500, an chen lailawkna tur sak nan Rs. 2000 bakah kum khat chhung a thlawnin buhfai an dawng dawn a ni.