Rebecca Welch chu Premier League-a hmeichhe referee hmasa ber tur a ni dawn ta a, December 23-a Fulham leh Burnley inkhel a thunun ang.

Kum 40 mi, Welch-i hian kum 2010 atang khan referee hna hi a thawk tan a, January khan mipa Championship-ah inkhel enkawl thei hmeichhe hmasa ber a lo ni tawh.

December-ah hian Sam Allison pawhin inkhel a enkawl dawn a, kum 15 hnuah Premier League-a mi hang inkhel enkawl leh hmasa ber tur a ni dawn a ni.

December 26 hian Sheffield United leh Luton Town inkhel a enkawl dawn a ni.

English football division sang palia mi hang referee hnuhnung ber chu Uriah Rennie a ni a, kum 2009 khan a chawl tawh a. EFL-a mi ngo ni lo referee hnuhnung ber, Jarnail Singh pawh kum 2010 khan a lo chawl tawh bawk.

“Rebecca-i leh Sam-a tan hun chhinchhiahtlak a ni dawn a, official tha ber zinga mi an ni,” tiin referee chief Howard Webb chuan a sawi a. “Hetiang hi an phu a ni,” a ti bawk.

Tunah hian English football-ah official zinga 8% chauh mi hang leh Asian an awm a. Kum 2008-a Rennie-a’n Premier League inkhel a enkawl hnuhnun ber hnuah khan mi hang referee an awm leh tawh lo.

Welch-i hi Championship-ah pawh kuminah a lo inlan tawh a, Women’s Super League, Women’s Champions League bakah nipui lai khan Australia leh New Zealand-a Women’s World Cup-ah pawh inkhel a enkawl tawh bawk.

November thla khan Premier League-a inkhel enkawltu zingah telin hmeichhe hmasa tel hmasa ber a ni a. Manchester United-in Craven Cottage-a si khat faia Fulham an hneh tumin fourth official a ni.