Premier League season khata goal thun tam ber a nihna nihrualtu leh khum mai thei dinhmuna ding mek, Erling Haaland chu fakin Alan Shearer chuan, “A engkim mai hi top quality a ni tawp mai,” a ti.

Haaland-a’n Pathianni zana 2-1 Fulham an hneh tuma minute thumna leka penalty a chhuih luh kha tun season-a a goal 50-na a ni a. Pep Guardiola team chu Premier League chung berah awmtirin season ruk chhunga a vawi nga nan nomawi la leh thei turin a chhawp hnai.

Kum 22 mi, £ maktaduai 51.2 senga June thlaa Borussia Dortmund atanga an lak luh, Norwegian forward hian 1986-87 season-a Tottenham Hotspurs tana Clive Allen-a’n goal 49 a thun chu a khum.

England-ah hian intihsiakna sang berah season khata goal 50 thun tling hi an awm lohna a rei tawh hle a, kum 92 chhung zet hmuh tur an awm tawh lo va, tunah erawh Haaland a lo lang ta.

1930-31 khan Tom ‘Pongo’ Waring chuan Aston Villa tan goal 50 a thun a, hetih laia UK prime minister chu Ramsay MacDonald-a a ni a, Indopui II-na hma tawh a ni.

“Winston Churchill-a a prime minister hma daih tawh maw? Pui lutuk,” tiin Guardiola chuan Haaland-a thil hlen chhuah a hriat chuan a sawi.

“Erling-a ka lawmpui a. Kan duh hlen chhuak turin a goal-te hian min pui a. Penalty pawh kha rilru lama inpeih taka a chhuih a ni,” a ti.

Haaland hian half century thleng turin inkhel vawi 44 chauh a mamawh a, a goal zinga 34 hi Premier League-a a thun niin Champions League-ah goal 12, FA Cup-ah goal thum leh Carabao Cup-ah goal khat a thun.

League-a nomawi an beisei mek bakah City hi Champions League semi-finals a luhpui tawh a, FA Cup-ah Manchester United nen final khelh hmabak niin nomawi pathum la thei turin a chhawp hnai mek.

Premier League-a season khata goal thun tam  ber nihna hi Shearer leh Andrew Cole chuan chelh thinin a nihrual mek a. Cole (Newcastle United, 1993-94) leh Shearer (Blackburn, 1994-95) te hun lai hian season khatah vawi 42 an la khelh lai a ni zawk a, tunah chuan vawi 38 chauh an khel tawh.

“Boruakah a tha a, a che rang a, a ball khawih a dik a, a pawimawh ber chu goal tam tak a thun hi a ni. Amaha engkim mai hi top quality vek a ni a. Hei hi Manchester City pawhin lak luh tuma an beih nasat chhan kha a ni a, a khel en a manhla tak zet,” tiin Shearer chuan a fak.

Manchester City defender hlui, Micah Richards khan February daih tawhah khan, “Haaland hi a pui lutuk. Record zawng zawng a khum thei ang,” a lo ti tawh bawk.

Haaland hian tun season-ah vawi 10 khelh tur a la nei thei a, Premier League-ah vawi ruk leh FA Cup-ah vawi khat a chiang a. Champions League-ah final an thleng a nih chuan vawi thum khelh hmabak a la nei thei.

England-ah hian season khata goal thun tam ber chu Dixie Dean niin 1927-28 khan Everton tan goal 63 zet a lo thun tawh.

Dean-a record khum tur hian goal 13 a la mamawh tihna a ni a; mahse, City goal thun khawl hi a inkhelh hnuhnung vawi 12-a goal 18 thun thei a ni a, inkhelh hmabak a la neih hi a khel vek thei a nih chuan a khum lo vang tih tu tan mah sawi ngam a ni rih lo.