Beyoncé Gielle Knowles chuan record thar a siam a, a hla thar 'Texas Hold ‘Em' hmangin Billboard Hot Country Songs chart-ah No.1 a hauh. Hei hi American singer tan chuan country chart-a din hmun sang ber a luah vawi khatna a ni a, Dolly Parton pawhin a lawmpui thu a sawi chhuak. 

Kum 42 mi Beyoncé hi hmeichhe zinga Hot Country chart leh Hot R&B/Hip-Hop Song chart-a No.1 hauh phak ve ve awm chhun a ni nghal a, mel lung pawimawh tak a phun. Mipa lamah erawh - Morgan Wallen, Justin Bieber, Billy Ray Cyrus leh Ray Charles te chuan No.1 hi an lo kai tawh thung. 

Grammy-winner hian a hla thar hi music streaming platform-ah a chhawp chhuak a, a solo studio album pariatna tur 'Renaissance Act II' chungchang a sawi chhuak bawk. He album hi March 29 hian tihchhuah a ni dawn a, fan lam pawh an phur tawh hle.