ZALEN, November 09, 2025: Red Bull Aizawl Tlang Ruam 2025 (Urban Downhill Racing)-ah nikumah pawh lo tel tawh, Nepal mountain biker Nirav Shrestha chu a chak ber a, atan kum tharah khawvel huap downhill urban mountain bike race hriat hlawh, Red Bull Cerro Abajo Series-a inlan theihna kawng a inhawng.

Inrinnia intlansiakah hian Shrestha hian minute hnih chuang hret (2.00.0293) chhunga tlankawng harsa, hlauhawm leh khirh tak tak zawh chhuakin chak ber nihna a hauh a ni.

Nepali rider hnu second 10 dawn (2:09.386)-a tlan thleng, Indian biker Meban Suiam chu pahnihna a ni a. Second khat pawh tling lo hnuah Yawar Ali Khan tlan thleng velehin pathumna a ni.

Intlansiakah hian a tirah mi 26 inlan tura beisei ni mah se a takah erawh rider 19 an inlan a, an zinga 17-in a tawp an tlan thleng.

Mizo biker pahnih, Alan Renthlei leh Samson Pachuau inlanin a sang pathumah inlan phak lo mah se a tawp thlenga tlan chhuak thei zingah an tel a. Alan-a hi paruknaah thlengin Samson-a hi 16-naah a thleng thung.

Red Bull Aizawl Tlang Ruam 2025 (Urban Downhill Racing) hi India-a hriat hlawh theihna a nih piah lamah khawvela hriat hlawh, Red Bull Cerro Abajo-a tel theihna tura kawng pawimawh a ni tel.

Red Bull Cerro Abajo Series hi kuminah vawi thum - Valparaiso, Chile; Guanajuato, Mexico leh Genova, Italy-ah neih a ni a. Kum tharah hian Chile leh Italy bakah Stuttgart, Germany-ah neih tura ruahman tawh a ni.

Red Bull Aizawl Tlang Ruam hi October 26, 2024 khan a vawi khat nan Upper Republic atanga Hawla Indoor Stadium inkarah neih a ni tawh a. Miten an hlutin khawvel huapa Mizoram tar langtu a tling a, kuminah hian kawng thui zawk leh harsa zawk, Upper Republic atanga ITI Veng thleng an tlan a ni.

RESULT:

1. Nirav Shrestha - Nepal - 2:00.293

2. Meban Suiam - India - 2:09.386

3. Yawar Ali Khan - India - 2:09.621

6. Alan Renthlei - India - 2:12.806

16. Samson Pachuau - India - 2:37:444