ZALEN, November 07, 2025: Khawvel huap downhill urban mountain bike race hriat hlawh, Red Bull Cerro Abajo Series-a inlan theihna kawng pawimawh ni phak, Red Bull Aizawl Tlang Ruam 2025 (Urban Downhill Racing) chu Inrinni hian neih a ni dawn ta a, kawng thui zawk tlan tawh tur niin rider 26 an inlan ang.

Red Bull Aizawl Tlang Ruam hi October 26, 2024 khan a vawi khat nan Upper Republic atanga Hawla Indoor Stadium inkarah neih a ni tawh a. Miten an hlutin khawvel huapa Mizoram tar langtu a tling a, kuminah hian kawng thui zawk leh harsa zawk turin, Upper Republic atanga ITI Veng thleng tlan tawh tura duan a ni.

A tel tur rider 26 hi khawvel hmun hrang hrang atanga kalkhawm an ni a, an zingah hian UCI Four-Cross World Champion vawi li ni tawh, Tomas Slavik leh Chilean rider langsar, Pedro Burns te pawh a tel.

Tlan tur mi 26 zinga a zahve aia tam hi India hmarchhaka mite an ni a, Mizo rider pahnih, Alan Renthlei leh Samson L. Pachuau an tel dawn bawk.

Red Bull Aizawl Tlang Ruam 2025 (Urban Downhill Racing) hi India-a hriat hlawh theihna a nih piah lamah khawvela hriat hlawh, kum tina Chile-a Valparaíso tlanga thirsakawra intlansiakna, Red Bull Cerro Abajo-a tel theihna tura kawng pawimawh a ni tel.

Red Bull Cerro Abajo Series hi kuminah vawi thum - Valparaiso, Chile; Guanajuato, Mexico leh Genova, Italy-ah neih a ni a. Kum tharah hian Chile leh Italy bakah Stuttgart, Germany-ah neih tura ruahman tawh a ni.

Zirtawpni chawhnu khan intlansiak neih tur chungchangah hian Sports Minister Lalnghinglova (Tetea) Hmar chuan a buaipuitu, Red Bull aiawh leh mentor pahnih, Slavik leh Burns te nen an inkawm a. Red Bull nen indawrin kum tharah chuan tourism calendar an buaipui mekah telh ngei tha a tih thu a sawi.

Czech mountain biker lar, Slavik-a chuan nikuma neih atang khan khawvel hmun hrang hrangah neih ve duh an tam phah tih a sawi a, a chhim tura kal an tam a, an pun zel theih tur thu a sawi bawk.

Nikuma lo tel tawh, Chilean biker Burns-a pawhin Aizawl awm dan chu down hill intlansiakna atan duhthusam a nih thu a sawi a, “Nikum kha nuam ka ti a, kumin hi a nuam lehzual ang,” a ti.

Red Bull Aizawl Tlang Ruam 2025 (Urban Downhill Racing) hi Nilaini zan khan Folkland Park, Falkland, Aizawlah Slope City documentary chhuah leh thuthar lakhawmtute kawma bul tan a ni a. A hnuah tlankawng tur zawh leh tlan chhin a ni tawh a, Inrinni hi Race Day a ni.