ZALEN June 28, 2026 : Excise & Narcotics Department (END)-in hriselna kaihhnawih avanga zu kawl leh zu in phalna, ‘Red Card’ an pek chhuah turah mi eng emaw zatin dilna form la chhuak tawh mah se vawiin thlengin pek chhuah a la awm lo.

END hotute hnen atanga ZALEN thudawn danin hriselna kaihhnawih avanga zu kawl leh in phalna dilna la chhuak awm nual tawh mah se vawiin thlengin dilna thehlut an la awm lo a, hei vang hian card pek chhuah a la awm lo.

END chuan Section 45 B(1) of the Mizoram Liquor (Prohibition) Amendment Act, 2025 tlawhchhanin hriselna kaihhnawih vanga sap zu (IMFL) kawl leh zu in phalna permit chu mamawhtute tan a pe chhuak dawn a. Red Card hmanga IMFL hralh chhuak tur hian engkim peih fel a ni tawh.

Red Card dilna tur form lak chhuahna turin Commissionerate office ground floor-ah desk siam a ni a, June 3 atang khan dilna form an pe chhuak tan tawh.

Card nei tur hian doctor-ten damdawi atana an chawhna lehkha an neih hnuah an awmna District Medical Superintendent-in an chawh chhante enfiahin phalna an pekte hnenah chauh pek an ni dawn.

Red Card hi kum khatah Rs. 5,000 man zel a ni dawn a, a diltu hnena pek an nih chuan kum khat a nung ang.

Aizawla Excise office-ah END chuan departmental store siamin zu an man, court-in a tihfel tawhte chu Red Card neite tana hralh chhuah a ni dawn a. Zu chu a man pangngai aia zaa 75-a tlawmin hralh a ni dawn a ni.

Hetihlai hian END-in a chhinchhiah danin kumin June 24 thleng khan ruihhlo vanga thi mi 26 (mipa 23 leh hmeichhia pathum) an awm tawh a, kum 1984 atanga ruihhlo vanga thi zat chu 2,023 (mipa 1,776 leh hmeichhhia 247) an tling tawh.