Manchester City boss Pep Guardiola chuan Liverpool chu a nauten Premier League nomawi an humhim theihna kawnga team sut tlang huphurhawm ber an nih thu a sawi. 

Table-a 10-na dinhmun hauh mektu Liverpool hian zanin dar 9 hian Anfield-ah pahnihna City an mikhual dawn a, Guardiola-a naute aiin point 13 zetin hnufual rih mah se nikum Premier League pakhatna leh pahnihna te inkhel hi a nep dawn lo. 

Arsenal chu hmahruaitu an ni mek a, Antonio Conte enkawl Tottenham chuan point thuma City phak lovin, pathumnaah an awm.

Team dang rawn lian chho zel mah se Guardiola chuan Reds a la huphurh ber a, zirtawpni khan zawhna chhangin Liverpool chu City tena nomawi an chawina tura kalkawng dal theitu lian an nih fo tawh thu leh tun tumah pawh an khingpui ber an la nih fo a rin thu a sawi. 

Guardiola chuan, "Game 10 chiah khelh tur awm tawh se, chu hunah chauh chuan Liverpool hi league table-a a sang ber tur chuan an invawrh hman ka ring tawh lo va, mah se game khelh tur a la tam em a, tiang reng hi an ni dawn lo tih ka chiang,," a ti.

Sawi zawmin,"An quality hi ka hria a, anni nena inhmachhawn hi game harsa tak a ni fo thin a, thil ropui tak ka beisei ngam ngai lo,” a ti. 

City hian tunhnai Premier League title panga zinga pali an la tawh a, Liverpool hian 2019-20 season khan Premier League trophy an chawi ve thung a, City aiin point 18 zetin an sang a ni.

Tun hnaiah tum hnih zet chu season tawp ni-ah City leh Reds te hi nomawi chawi tur zawk zawngin an innawr hle tawh a ni. Season liam ta khan City hi an champion lo teuh hle a, si an phurh hmasak zet tawh hnuah Aston Villa chu 3-2 in an lehthal a, Jurgen Klopp-a team tena Premier League an chawi theihna kawng leh an 'quadruple' beiseina chu an tihtawp sak a ni. 

Guardiola chuan, "Thla engemaw zat kalta atang khan Liverpool nen hian English football-ah ropui zawk nih kan inchuh a, title pali an la a, shot an nei tam zawk a, possession an nei tam zawk bawk a ni," a ti. 

Sawi zawmin,"Team inlungrual tak leh manager tha tak nei an ni a, thil engkim a thleng thei a ni. Inkhelh hi chu alo sawilawk ngawt theih loh, inelna boruak a zirin thil thleng a danglam thut thei a, hun tha leh hun tha lo a awm a, hun kal tawh thlirlet reng erawh a tul hran lo,” a ti. 

Klopp chuan tun kar tawp kan inkhelh tur hi title decider a nih theih thu a lo sawilawk tawh a, mahse tun an dinhmunah chuan mi tam zawkin an awih chiah lo maithei. 

Jurgen Klopp-a’n Man City dan an tum dan a sawi
Jurgen Klopp chuan zanin a Liverpool-in Manchester City hmachhawn an tum dan a sawifiah a, mahse he an ruahmanna hi kum thum dawn lai chu a naute hian Premier League-ah an la hmang dik hleithei lo. 

Anfield match hi tun season-a City leh Liverpool te league-a an in hmachhawnna hmasa ber tur a ni dawn a, ropui takin Reds lam hian bul ṭan lo mah se match hmuhnawm tak a ni dawn tih a chiang. 

Tun season-ah an player thar Erling Haaland hmangin City-in ropui takin bul an tan a, Reds defender te hian Haaland hi an la hmachhawn ngai lo va, team pahnih inkarah  danglamna a thlen thei dawn a ngem? Game 9-a goal 15 khung thei a nih vangin Reds tlarhnung chu an inpuahchah that ve deuh chu a ngai ngeiin a rinawm. City hi tunah pahnihna niin pakhatna Arsenal aiin point khatin an hniam zawk a ni. 

Liverpool hian match hmasa pariatah vawi hnih chiah hnehna an chang a, tunah 11-naah awmin Fulham, Brentford leh Brighton te hnuaiah an awm a, an chak hnuhnung ber chu kar kalta mai kha niin hmahruaitu Arsenal lakah niin 3-2 in an tlawm a, mahse inrintawkna siamsak tur tawk velin Champions League lamah chetha leh thungin 7-1 zetin Rangers an sawp ve leh thung. 

City leh Liverpool-te hi season nga kalta chhung khan Premier League title zinkawnga kal hmasa zawk nih tuma inchuh chho reng an ni a, zanin an in hmachhawn tur chungchangah  Klopp chuan an hmathlir a sawi chhuak.

Klopp chuan, "Inkhel tura inbuatsaih hi nuam ka ti a, football-ah chuan inkhel tura inpuahchah lai hi thil harsa leh challenge lian ber a ni," a ti. "City hi tun dinhmunah chuan khawvel-a team tha ber an ni a, anni hmachhawn hi chu engtik lai pawhin thil phurawm a ni ngai lo. Hrehawm tawrh a ngaih hun a awm a, mahni inthunun a ngaih chang a awm bawk,” a ti.

Klopp-a enkawl Liverpool hian lehlam pawl an nawr nat thin em avangin an style an larpui hle a, chu game chu Pep Guardiola-a team te pawhin khelh harsa an tih chhan a ni bawk. Tun dinhmunah City hian chak zawk nih inrinna an nei sang zawkin a rinawm a, mahse game tha chho hret hret Liverpool hian tlawm mai chu an duh bik hauh lovang le. 

"City lakah hian kan huaisen fo tawh thin a, zanin hian kan formation pawh a danglam nual thei. Defense kan ngai pawimawh dawn a, kan that dan berin kan inrem ang. Anni nena inhmachhawn hi chu pressure a sang thin a, harsa viau mahse theih tawp kan chhuah ang," tiin Klopp chuan an hma hun a thlir lawk.