World Cup khel a Qatar kal tur zawnna hnuhnunga Australia leh Peru an inkhelh tum khan chanchin makdanglam tak nei mipakhat chu Australia ram tan khan a khel a, a hming chu Awer Mabil a ni. Kha inkhelhah khan hun pangaiah team pahnihte chu goal thun lova an inhnehtawk hnuah penalty hmangin chak zawk an zawng a, chhuih tura ruat mi panga ten an pet zawh tawh hnuah pawh team hnih te chu an la inhnehtawk cheu. 

Team lehlam lehlam atangin penalty pet tur mi pakhat ve ve an thlang chhuak leh a, player thlan chhuah pahnihte tana a huphurhawm zual bik em em nachhan chu 'sudden-death' ni tawhin a pet goal zawk zawk chak a ni tawp tawh. Player pakhatin a pet goal a, pakhat zawkin a pet hlah chuan an team chu an chak lo nghal a, chu bakah kumin World Cup an khel ve thei dawn lo tihna a ni. 

Qatar World Cup khel tur zawnna inkhelh hnuhnung a nih vangin player lam tan pawh boruak chu a rit ve hlein a rinawm. Khawvel ram lian ber pakhat Australia team aiawh turin raltlan, refugee camp-a seilian Awer Mabil chu penalty pet tura thlanchhuah a ni. Boruak rit tak hnuaiah chuan zam hauh lovin a rawn pen chhuak a, amah a inringtawk bawk a, a chhuih lut ngei bawk. Peru lam atangin Alex Valera a rawn pen chhuak ve thung a, a vanduai nge kan tih dawn Australia goalkeeper Andrew Redmayne chuan a lo dan sak bik ta hlauh mai le. Australia player zingah player lar leh hmingthang tak tak awm mah se, kumin World Cup khel tura Peru an hnehna kawngah hi chuan player pawimawh bik pahnih an awm a, chumite chu Awer Mabil leh Andrew Redmayne te an ni a tih loh theih loh. Kha inkhelha an chak vang khan Australia chu a zawna World Cup vawi 5 an khelhna turin an tling a ni.

Kenyan refugee camp atang sei lian Mabil-a chanchin mak leh ropui danglam tak hian Australia mai nilovin, tunlai football khawvel titi tui ber pakhat a ni mek. Winger Mabil chuan,"Keimah ka inring tawk a, ka pet goal dawn tih kha ka hre lawk a ni ber mai. Hei hi kei leh ka chhung ten Aurtralia ram hnena lawmthu kan sawi theih dan awmchhun a ni si a," a ti. 

Awer Mabil hi Kenya refugee camp pakhata piang a ni a, a chhungte hi Sudan tualchhung buaina vangin Kenya ram lamah hian refugee angin an pem lut a ni. Hetih hunlai hian Mabil te hian nikhatah chaw vawikhat bak a ei ngai lo va, hunawl hnawhkhah nan football an khelh thin bak chu tih tur dang em em an nei lo. 

Kum 2006 khan Kenya refugee camp atangin Australia lamah an pem lut a, hetih hunlai hian football a khelh chhunzawm ve zel a, a len ve deuh hnu rawlthar nun a hriat tan tirhin football thiam belh zel duhna rilru nen Adelaide United a zawm a, he hmunah hian nasa takin hma a sawn nghe nghe. Denmark lamah insuan lut lehin FC Midtjylland tan a khel leh lawp lawp a, tunah tak hian loan-a chhuakin Turkish club Kasimpasa tan a khel mek.

Awer Mabil chuan an nunhlui sawiin,"Rap in-ah ka piang a, in te tak te a ni. Kha tih hunlaia kan chhungkaw chenna in ai khan tuna ka thlenna hotel room hi a lian zawk daih. Kan chhungkuaa kan chenna neihchhun chu refugee camp a mi kha a ni," a ti.

Sawi zawmin Mabil chuan,"Australia in an rama inbenbel min phal sak hlauh a, kei leh ka chhungte tan dam khawchhuahna hun min siam saka kan vannei takzet a ni. Kan chhungkua hi nun thar min pe a, an rama cheng tura hun remchang min siamsaktu Australia chungah hian ka lawm em em a ni," a ti. 

Mabil hian coach Graham Arnold hnuaiah regular takin Socceroos tana khelhna huntha hi a nei thei a, tuna a thil tawn mek hian refugee dangte pawh beiseina eng nei tura a chau phur ngei a beisei thu Mabil hian a sawi chhuak nghe nghe. "Ka ti goal a, ka team-mate dang te pawhin an ti goal. Tupawhin tha takin kan khel tlang vek a, an zingah chuan refugee naupang pawhin theihtawp chhuahin a khel ve a ni," a ti. 

Mabil a unaupa Awer Bul chuan Adelaide Advertiser newspaper hnenah,"Mabil-a vang hian kan chhungkua kan lawm zia mai chu, kan phawklek phah nasa mai. A thil tih avang hian, kan community refugee camp-a piang mipa naupang te pawhin chona thar an hmachhawn ngam phah ngeiin ka ring. Australian team tana khel tura Mabil-a rawn pen chhuak kan hmuh hian min tiphur thin hle a ni," a ti.