Aizawl: Nimin khan Reiek Village Council leh NGO hrang hrang bul tumin Reiek tlang thenfai hnatlang runpui neih a ni a, hnatlangah hian mi 300 chuang an thawk. Reiek tlang hi Reiek khaw mipui te chuan theih ang tawkin an humhalh a, bawlhhlawh te thianfai in hnatlang an lo nei tawh thin a, tlang tlawhtute tana nuam zawka kal theihna turin kawng hnim lai deuhte an samfai bawk. Reiek tlang hi a ni telin tlawh tu an pung chak hle mai a, bawlhhlawh a tam chak em avangin mumal zawk a enkawl anih theihnan Reiek Tlang Tourism Development Board te din in chak takin hma an la mek a, Entry Fee te siamin mumal zawka enkawl dan an ngaihtuah mek a ni. Mizoram sawrkar chuan nasa takin Reiek tlang leh a chhehvel ah hian hma an la a, Wall Climbing, Zip Linning, Rope Activities, Obstacle Course, Repelling, High Rope Course, Rifle Shooting, Body Zorbing leh Children Park te dahin hawn theih a ni tep tawh a. Tourism Department chuan September 22, 2018 hian Adventure Festival buatsaih in heng Activities hrang hrangte hi hemi ni atan a thlawn a hman theihin an siam dawn bawk a ni.