Aizawl February 15, 2023: Tourism Dept hnuaia hnathawh “Component 1 of Development of Immediately Required Infrastructure for Tourist Development at Reiek tlang” DJ Consultancy Services ten thawh mek chu February 13, 2023 khan a hmunah ZPM chuan an enfiah a, duhthu a sam lo an ti a, hnathawh leh sum hmanna a inphu lo niin an sawi.

ZPM chuan, "He hna hi Works Components 12-ah then a ni a, Sanction Amount leh hnathawhte a inmil lo hle-ah kan ngai a. Hna thenkhat chu a taka min kawhhmuh tur an nei lo. An hnathawh zawh tawh nia sawi leh department-in sum an pekchhuah hi a inphu lo hle," an ti.

ZPM PAC member TBC Lalvenchhunga chuan, "RTI chhanna kan hmuh atangin he hna hi DJ Consultancy Services hminga hmuh a ni a, a hmuna kal a kan zawh chuan hnathawktute leh viltute hi NECS hnuaia thawk vek an ni. Hna an lo thawh mek Architechture & Structure Drawing pawh NECS siam a ni. DJ Consultancy Services hminga thawh ni mah se, a tak takah chuan Minister fapa consultancy firm NECS thawh ngei a ni tih a lang chiang hle a. A department chan hnuaia hna hrang hrang te pawh hi duhsak taka restricted tender hmanga pek vek a ni a, heng hna thawktu hrang hrang consultancy firm te hi a kawr mai niin a phenah hian Minister hi a biru ngeiah kan ngai a ni," a ti.

Restricted tender, hnathawh hmanhmawhthlak leh specialist ngaia hna thlan thawktute hi hming hriat ngai loh, office pawh nei mumal lo, an experiences leh work done pawh la hmuh loh an ni tlangpui a. Hetiang a hna hmanhmawhthlak thawk tura hna pek ni si, an thawk muang em em a, bul la tan loh pawh tam tak a la awm a ni.

He hna hi July 30, 2020 atanga thawh tan a ni a. December 2021 ral hmaa thawh zawh tur a ni. Hun tiam chhungin an zawh theih loh avangin extension dil a ni a, thla 13 chhung pek belhin January 2023 a thawh zawh tur a ni. RTI chhanna atang chuan nikum December 7, 2022 khan 87% zo tawh anga chhan a ni. Pawisa pekchhuah tawh zat hi Cheng nuai 356.485 a ni.