ZALEN December 22, 2025: Excise & Narcotics Minister Lalnghinglova Hmar chuan vawiina thuthar thehdarhtute a kawmnaah Rel service chu zu leh ruihlo tawh ruk nana hmang an awma ngaihna a awm tih Home Minister, Central YMA leh sawrkar mi pawimawh te nena meeting an neihnaah sawi chhuah a ni a ti.

Excise Minister hian Rel a rawn luh hnuah khualzin an pun phah nasa a ti a, heng karah hian zu leh ruihhlo tawlhru an awmna an hriat thu a sawi a, hemi tur hian Central YMA te nen pawh hmalak an tum tih a sawi a, chutihrualin state dang leh ram dang atanga rawn kalte hi chuan MLP Act in a phalsak angin rawn kenluh theih chin an nei a ti.

Assam nena inkalpawhna kawng a tam tawh avangin ruihhlo chhuk leh chho a awm reng a, chutiang bawkin Tripura lamah pawh a ni tho a ti a, Assam nen hi chuan thawkho turin ruahmanna an siam tawh tih a sawi a, Tripura Excise Minister pawh nakum lamah sawipui a tum thu a sawi.

March 2026 atanga 'Operation Jericho' an kalpui chuan rah tha a chhuah chho mek niin a hriat thu Lalnghinglova Hmar chuan a sawi a, khaw tinah Police leh Excise duty an awm takah chuan YMA leh Village Council lam pawh an phur a, hma an sawn tih a sawi. Khawchhak lam tlangdun khawtin an tan avangin Heroin No. 4 pawh hi rawn lut a tlem a, Manipur lamah pawh a lut leh tawh nia an hriat thu a sawi. Heroin hi kumin kum tir lama a man leh tuna a man chu a let a nih tawh tih Excise-a thawktuten an hrilh tih a sawi bawk.