Aizawl; Bairabi atanga Sairang thlenga Rel kawng siam tur tana Mualkhang VC ramchhunga paltlang tur ram neitute chuan July ni 3 khan an ram neihna pass leh document te Kolasib DC Office-ah Railway hotute hnenah an hlan. Ram inhlanna hunah hian Railway lam atangin North East Railway Executive Engineer, Gautam Sinharay a tel a, Mualkhang aiawhin Village Council president Biakliana leh YMA President, Khawvelthanga te an tel a. Sorkar lam aiawhin Kolasib DC, Jitender Yadav a tel bawk. Mualkhang ram Rel kawngin a paltlang tur hi Km 4-a thui niin, ram Hactare 52 a zau a ni a, helaiah hian ram neitu mi 148 awmin heng mite hnenah hian zangnadawmna pek vek an ni tawh bawk. Gautam Sinharay chuan Bairabi - Sairang Rel kawng siamna tur hian cheng tluklehdingawn 3854 ruahman a nih thu leh, hna hi a zawh hun tur bituk awm lo mahse, kum 2017-ah chuan zawh hman an tum thu a sawi a. Tunah hian Bairabi atangin hna hi tan a ni tawh thu leh hma lak chhoh zel a ni dawn tih thuthar lakhawmtute zawhna chhangin a sawi.