ZALEN December 29, 2025: ZPM General headquarters thuchhuak chuan Sairang - Guwahati rel Zing dar 6-a chhuak tura thlak hi CM hmalakna ni awm taka social media-a darh hi thu dik lo a ni, an ti.  

Northeast Frontier Railway (NFR) General Manager vawiina thuchhuak chuan January 1, 2026 atanga Sairang leh Guwahati inkara rêl tlan hun tihdanglam chu sût a nih thu thuchhuah an siamah an tarlang ve leh thung.

ZPM chuan, "Zin mite, a bikin hnam dang/tourist ten khaw en laia Mizoram mawina, tlang, lui leh ramngaw te an hmuh theih nan zan dar 7 aia hma deuh, khaw thim hmaa chhuak tura rawt a ni a. Hetiang a nih mek lai hian Railway thuneituten zing dar 6-a Sairang atanga chhuak turin ruahmanna an rawn siam thar a. Hei hi zin mite tan a remchan dawn loh avangin zing dar 6 a chuak tur hi cancel tur leh a chhuah hun pangngai zan dar 7-a Sairang atanga chhuak turin hmalak leh mek a ni," an ti a.

"CM rawtna angin Sairang atanga Silchar nitin service tur pawh flag-off/tlan tir thuai tura ruahmanna siam mek a ni a, hei bakah hian zin mite tan a Vistadome coach/chair car, a chung (roof) lang tlang thei coach 1 pawh awm tura ruahmanna siam a ni," an ti bawk.

Rel chhuah hun chungchangah hian Northeast Frontier Railway (NFR) General Manager chuan, "January 1, 2026 atanga Sairang leh Guwahati inkara rêl tlan hun tihdanglam chu sût a ni. Rel chhuah hun chungchangah hian Northeast Frontier Railway (NFR) General Manager chuan vawiin Dec. 29, 2025 hian hriattirna a tichhuak a; Sairang-Guwahati rel no. 15609/15610 chhuah hun January 1, 2026 atanga tihdanglam chu sût a ni a, tuna chhuah hun pangngai angah a chhuak zui zel dawn," tih a tarlang.

January 1, 2026 atanga Train no. 15887/15888 - Vistadome Express coach tlantir tura ruahman tawh pawh sût a ni an ti bawk.

Hetihlai hian rel tlan dan tur chungchanga Union Railway Minister Ashwini Vaishnaw leh Chief Minister Lalduhoma inkawmna chungchang November 24, 2025-a sawrkar thuchhuakah chuan Sairang to Guwahati Rel kal hun hi chu passenger-te awlsam zawkna turin Guwahati hi zing dar 4:30 a thleng thla hman tura a kal hun siamrem Chief Minister hian a rawt a. Railway Minister rawtna hi a lo pawm tiin ziah a ni.

Kolkata to Sairang Station-a zan dar 7:45 PM a thleng thin chu khualzinte tana awlsam zawk turin tlai dar 3:00 PM a thleng tura siamrem rawtna Chief Minister hian a thlen a. Railway Minister hian a lo pawm a ni, Chief Minister hian Sairang to Delhi Rajdhani Express chu khualzin an tam avangin kar khata vawi hnih tal tlantir turin rawtna a thlen bawk a, hei hi Railway Minister chuan lo pawmin, bawhzui nghal a nih tur thu a hrilh a ni, tiin sawrkar thuchhuakah hian tarlan a ni bawk.