Aizawl: Sawrkar laipuiin rel kawng a sialmekah Bairabi atanga Sairang thleng rel kawng siam hna chu kum 2020 ah chuan peih hman tum a ni. Indian Railways chuan hmarchhak state hrang hrangte inkalpawhna tihchangtlun nan Rs. vbc. 90,000 dahin hemi hnuaiah hian Bairabi atanga Sairang, km 51.38 chu a tel ve a. North East state zingah Assam, Arunachal Pradesh leh Tripura chuan tha takin rel-a inkalpawhna an nei tawh a, Mizoram, Manipur, Meghalaya leh Sikkim chuan an la nei lo a ni, heng zingah hian Aizawl chu a nei hmasa ber tur a ni ta niin thudawnna chuan a tarlang. Indian Railways hnathawh turah hian km 795-a thui rel kawng Arunachal Pradesh atanga China ramri thleng tur pawh a tel a ni. Meghalaya-a Byrnihat atanga Shillong chhuah lam rel kawng tur chu Khasi Student Union dodalna avangin a thuanawp rih a, no-objection certificate pawh Khasi Hill Autonomous District Council-in an la pe chhuak lo a ni. Sikkim ah chuan Indian Railways hian forest department atangin clearance nghah a nih thu leh kum 2020 a a beiseiawm ve tho ni a sawi a ni bawk. Narendra Modi-a sawrkar hnuaia Mission 2020 ah chuan North East State 8 te rel a kalpawhtir vek thei tura hmalakna chu Indian Railways kutah dah a ni a. International level-ah pawh China ramri hmun thumah land survey zawh a ni hnai tawh a, he survey hi zawh a nih hunah report chu Ministry of Defense-ah an thehlut dawn a ni.