Heavyweight champion Oleksandr Usyk chuan Britain Anthony Joshua nena rematch an neih turah inpuahchahna a neih tan tur thutlukna a siam. Usyk hian July thlaa Joshua hmachhawn turin ruahmanna a siam. Nikum September thla khan champion lai Anthony Joshua belt pa 4 lai kawl mektu chu hnehin heavyweight champion a rawn ni.
   

Kum 35 mi Usyk hi Russian in an run mek Ukraine mi niin a ram chhanhim tura pen chhuakin sipai a zawm ve a, Nilaini pawh khan ala buai zak zak hle. Usky chuan Zirtawpni khan Instagram lamah post siamin,"Anthony Joshua nena rematch kan neih tur thlirin inpuahchah tan ka tum ve tawh a ni," a ti. 
   

Nikum September thla khan London-a an inhnek tumin Usyk hian unanimous hmangin Joshua belt kawl lai WBA, WBO IBF leh IBO te a chhuh vek a, kumin May thla hian rematch nei tura ruahmanna siam ni zet mah se an ram buaina vangin June thlaah a sawn hla leh a ni.