Aizawl: Mizo Zirlai Pawl huaihawtin nimin khan Pachhunga College Multipurpose hall-ah Remna ni hman a ni a, Mizoram remna atana thawhhlawk mi pathum Laldenga, Lal Thanhawla leh Lalkhama te hnenah chawimawina hlan a ni. Remna ni hmanna a khuallian Chief Minister Lal Thanhawla chuan, “Remna hi a man a to a: chuvangin, a vawnhim hi mi tin mawhphurhna a ni,” a ti. Remna ni hmanna hi MZP Vice President B.Vanlaltana chuan a kaihruai a, khuallian Chief Minister Lal Thanhawla chuan thu sawiin,  Mizoram buaina chu politics buaina anih avangin silai hmang lova politics a chinfel a ngaih avangin lalthutthleng a kian tih a sawi a, “Lalthutthleng ken hi khawvel hmun dangah a awm ve ang em aw tih a ngaihtuah theih a ni,” a ti a. Mizoramin remna a neih avangin GSDP leh per capita income a san phah niin a sawi bawk. Thusawitu dang, MNF President Zoramthanga chuan Mizoram remna chu khawvel remna awm zingah a hlawhtling ber zinga mi a ni tiin, “Zoram mipuite thawhchhuah a ni a, a chhiat hlau takin i venghim ang u,” a ti a. Remna chuan mi tin a huap vek niin a sawi bawk. ZPM hruaitu Lalduhoma chuan inremna hrilhfiah dan a inang lo chu pawi a tih thu a sawi a, “Remna hi a hlu a; mahse, tuna remna kan neih hi duhtawk mai tur kan ni lo a. UN hnuaiah Zofate ropui leh lian zawka kan kalna tur a ni,” tiin a sawi bawk. MZP President L.Ramdinliana Renthlei chuan mipuiten remna an hlut zual zel theih nan remna ni chu hmang an ni tih a sawi a, “Remna hi kan hlut thar a, vawnhim zel hi mi tin mawhphurhna a ni,” a ti. MZP President chuan Archeological Survey of India ten Vangchhiaa hmanlai Mizo pipute sulhnu an zirchianna Hindu-ho sulhnuah an chhuah nia sawiin, “Hetianga Hindu ho sulhnuaa an chhuah leh chuan ASI te hi Mizorama an lo luh MZP chuan a phal tawh dawn lo a ni,” a ti bawk. Nimin Remna ni hmannaah hian YMA, MUP, MHIP leh MSU aiawhten thu an sawi.