Hapta khat liamtaah khan Mizoram chuan Remna Ni hman a ni a, Congress Party, MNF leh ZNP te chuan a hran theuhin an hmang a ni. Hun eng emaw kalta atang khan Remna Ni hian boruak a nei deuh hat ziah a, a tir lamah chuan ram pumin kan lawma, mipui an hlim a, a hlutna pawh a la sang hle Hun a liam a politic a hamthatna neih tumin party te’n an inchuh ta mai thin a, hei hian Remna leh Muanna hlutna a ti tlahniama, tamtak beng a kham a, mi pangngai beng rawngah a lut lem loa mahni party mi leh sa te inchawhphurna mai niin a lang thin a ni. Party thenkhat hi chu June 30 a thuthlung ziah a nih theih nana an thasen mipuiin an hriatpui loh an hlau emaw tih mai tur a ni a; party pakhat chauh ta ang hrima dawnsawn theih tura sawi te a awm thin a; insawi luh phet tum an awm bawk. Hman atanga kumin thlengin Remna Ni bawrah tawngkam thar leh sawi dan thar a piang tawh a, ‘Lal thuthleng in kian tihte, haw hawa nawr chhuahn tihte, engnge maw sual thluk vanga thleng ta nia sawite, barh luih vanga awm’ ni tein sawi thin a ni. Kumin hian kum dang zawng aiin serh a hlawh a, MLA inthlan hnai zel avangte pawh a ni pakhat ang. Tun tum pawh khan hriat nuam lem lo tawngkam Party hruaitute atangin a awm a, Mizoramin Remna leh Muanna kan neih theih dan hluttu te rilru a hliam a rinhlelh awm loha; kan ram Buai atanga Remna thuthlung ziah inkar hre pha lo thangthar tan phei chuan awmze nei loa bur chhe khawn ri lek a ni a. Hlut a hnekin ninawm lamah a kal a, Remna hlutzia a hliahkhuh a, tun ang reng a nih chuan engtik niah emaw chuan he Remna Ni ngaihnepna a hring chhuak thei hial ang, a hlimchhawna kan hlut dan leh vawiin a mipuiin an hlutna chu a inthlau tawhin a lang a, a hniam zawngin a kal zel palh a hlauhawm khawp mai. Political party te hian an tan luatah Remna Ni leh a hlutna an tihchhe thei a chuvangin tawngkam leh sawichhuah duh dan te pawh a ‘êng’ (positive) lam ni hram hram sela duhthusam a ni. Chuti a nih loh chuan remna a thlen theihna tura hmalatu party vek hian an insen sonate chuan mahni vekin an ti thlawn dawn tihna a ni a; a hlutna phochhuak thei tu chu political party tho a ni a, an koah a innghat thui hle. Politik-ah hian engkim a leng emaw tih pawl an la awm hi a lungchhiat thlak a, thu na deuh deuh inchhuah khumte, mimal insawichhiatnate, thudik hrula thu sawi chhuah thlengin a thiang nia ngaihdan paih a hun tawh a, thubuai awrh theihna te a ni hial a. He ngaihdan hi Remna Ni ah a lang chhuak ta thin a, a awmze bo thak chu sawiloh a letlingin a chhuak tan chu a ni ber e. ‘Ram Buai’ lai hrepha chin te hian ‘buai’ hrehawmzia an theihnghilh ta mai em ni? Chhungkua tam zawkin an tuara, ram pawna pem darh phah chhungkuate, mi hruaichhuah chhungte hnena kir tawh lote, zirna leh eizawnnaa hma hun a chhiat vanga an nih tur ang an thleng zo loa, thlahte thlenga a nghawng te an awm. A nghawng chhuah hi thil namai lo niin kan ram kalkawng a sawi danglama, Mizo history ah a lailum a luah reng tawh dawn a ni. Hrehawm tam tak tawrh hrep hnua Remna leh Muanna hlutzia hretu Mizo te hian Remna Ni hlutna hre thar turin rilru puahchah ila. Inchhung khura thlabara awm hrehawmzia te, hnam dang sipai hrawn rapthlak zia te, ram anga hmasawnna ti thuan-awptu a nihziate hi rual u zawkte hian thangthar te rilruah awn lam nei lovin tuh thei se la a duhawm hle. He Ni denchhena inbeih hi political party te pawh hian an hlawkpui lemlo a, thangtharah phei chuan kori a tu lem lo tih te hi hre thar sela, a hlawk thei ang ber tur zawngin kuaiher tum sela. Remna leh Muanna hi tu ta mah a ni bik loa, mimal, pawl, khawtlang leh kohhran anga Mizo mipui te tanrualna a ni a, hmanruaa hman tur chi a ni lo. Kum 20 dawn chu thlamuang takin kan awm tawh a; a. Inbeih nana hman a nihzel chuan a hlutna kan hriatchhuah meuh chuan kan hloh hman ang tiin suangtuahnaah a awm a ni !