Aizawl June 28, 2024: Vawiin khan Remna Ni vawi 38 na cham lawmna Mizo Zirlai Pawl General Headquarters ten LPS Arena, Falkland, Aizawla an buatsaih chu Chief Minister Lalduhoma chuan khuallian niin a hmanpui a, Remna a awm theihna atana mi pawimawh te a lam chhuak a, MZP pawh remna atan thawktu ropui tak an nih thu a sawi a, Laldenga nen hna an thawh dun thin dan te a sawi.

Lalduhoma chuan, "Remna a awm theih nana theihtawp chhuahtu All Party Leaders te, Student Joint Action Committee te, Kohhran hruaitute, hun harsa tak kara Law & Order kengkawh hram hram tu Pu Lalkhama, IAS, Chief Secretary te an fakawm em em a. Vawiina MZP ten an chawimawi kum 1981-a MLA atanga bang ta te hi, remna a awm theih nana MLA bang hmasaber te an ni a. An phu tawk chawimawina an dawng lo fo ni tein ka hre thin, chawimawi an phu hle a ni. Zirlai pawl, vawiina Remna Ni ropui taka lawmtute hian remna kha in au chhuah, in thawhchhuah a ni tih lo hrereng ang che u," tiin remna a awm theih nana thil thleng pawimawh zualte a tarlang.

Remna a awm theih nana khatihlaia India Prime Minister Indira Gandhi ngenna leh MNF President Laldenga pawmpui ngeia IPS hna a bansan tak thu te pawh a tarlang. "IPS ka bansan hnu lawkah Pu Laldenga hmuin London ka zin a, ni 5 ka cham a, India sawrkara a thilphutte kan endun thin a, kan sawiin an duang bawk a. Chuvang chuan "kan" tih tawngkam te pawh ka hmang ve mai thin," a ti. Chief Minister chuan, "Rambuai laia hnam sipai, nunna chan te kha ram tan an thi lem lem lova, Mizoram an hmangaih avangin an martyr a, zah leh chawimawi an phu em em a ni," a ti bawk.

Tun hnaia India ram chhung leh ram thenawma zofate awmna apianga buaina leh harsatna rawn thleng chu Zofate inpumkhatna tura Pathian remruat, nakin lawka malsawmna Zofaten an dawnna tur a nih a rin thu a sawi a. "Chuvang chuan inpumkhat ang u, thinlunga pakhatah insiam ang u," tiin zofa zawng zawngte a sawm a ni. Amah dawr thintu thenawm state leh ram tea zofate pawh, pawl hran hranin thu hran rawn keng lova; pumkhat ni chunga thu khat rawn keng thin turin a chah a ni.

Lalduhoma chuan, "MZP hian Politician eiru lo berah min lo thlang tawh a, Remna Niah chawimawina min lo hlan tawh bawk a, ka lawm em em a ni. Ramriah buaina a lo thleng a, MZP inlo lang thin, thenawm ramah zofaten harsatna an tawk a, indonate, tuilian te an tuar a, MZP in lo lang vat thin, MZP hi kan hnam tan a hlu em em a ni. Politics tuinu laka him chungin remna chawi nung zelin, ram leh hnam tan lo bei zel ang che u," tiin zirlaite a chah a ni.

MZP President H. Lalthianghlima chuan pawl zawng zawng leh mi zawng huap Remna Ni lawmna an buatsaih thin tih sawiin, sawrkar pawhin MZP huaihawt hi rem min tihsak a. Tu ta bik mah nilovin kan zavaia tan a ni tih pawmin, i tel tlang dial dial ang u, tiin mipuite a sawm.

MZP hian kumtin remna a awm theih nana mi pawimawhte chawimawina an hlan thina, kuminah hian JH Rothuama, P. Lalupa, Lalthanzauva leh Ngurchhina te hnenah chawimawina an hlan a ni. Anni pali te hian Remna a awm theih nan kum 1981 khan MLA an nihna an bansan a ni. JH Rothuama leh P. Lalupa te hi an la dam a, anmahni ngei lokalin chawimawina hi an dawng a. Lalthanzauva leh Ngurchhina te erawhin mual an liam tawh avangin an aiawhin an tu leh faten an dawng thung.