ZALEN June 22, 2026: Mizo Hnam Runah chhung inkhawm vawiina neih a thusawitu MNF President Zoramthanga chuan Khawvelin remna hlutzia an hre zel a, MNF pawh remna thlen turin an tangkai zia midangin an hre zel a ni, a ti.

MNF president chuan tunhnaia Delhi a zin report a pe a. Union Home Minister Amit Shah leh mi pawimawh tak tak a hmuh thu sawiin, tha takin an inkawm, tih a sawi.

Mizoramin remna a neih chu Pathian pek a nih thu sawiin Zoramthanga chuan, "Pathianin remna min pek hi min ninhlei pek a ni lo. Remna chanchin tha hril zel tur leh a chanchin tha kan hrilh zel theih nan Mizote hi Pathianin remna min pe a ni. Khawvelin remna hlutzia an hre zel a, MNF pawh remna thlen turin kan tangkai zia midangin an hre zel a ni," a ti.

MNF chungchang sawiin, "MNF hian a hranpain ropuina bik kan nei lo a, kan danglamna bik erawh chu Pathian leh kan ram tan titu kan nihna hi a ni. Chanchin tha hril turin he hnam Pathian tana buatsaih hi MNF tum ber a ni reng dawn a. Hniam chang nei thin mah ila, Lalpa nghak tlattu leh Pathiana innghat tlat kan nihna hi a lang thin a. Lalpan mi chawi sang leh thin.

"MNF Party chu sawrkar leh turin a inbuatsaih leh mek a. Chumi atan chuan a tul ang angte buaipui chhoh mek zel a ni. MNF-ah nghet takin, Pathian ring chungin i awm zel ang u," a ti," a ti bawk.

Chhung inkhawm hi General Secretary Lalrinsanga Ralte. MLA -in a kaihruai a, Isak Malsawmtluanga, Secretary-in hunserh a hmang a ni.