Ningani kalta khan I&PR Conference hall, Champhai ah Selam thil thleng chungchangah Pu Zoengsanga Assl. DC kaihhruai nain Meeting pawimawh tak neih a ni. He meeting a tel tur hian Lalthangliana Murray, Chief Conservator of Forest, Environment & Forest Department chu Aizawl atangin a kal a, meeting tura beisei Selam khawtlang aiawh te erawh chuan, resolution an lo siam tawh ‘Selam khawtlang mi 14 te case tihtawp a nih hma chuan Environment & Forest Department nena inkaihhnawih Committee a tel loh ni rawh se’ tih leh ‘May ni 16 a thilthleng avangin khawtlang hruaitute leh mimal tupawh hmun dangah E&F Dept. inbiakna neihpui turin tumah kal loh tur, sawiho ngai a awm a nih pawhin Selam Pa tapchhak zawlah sawi tur’ tia thu an lo tihthluk tawh avangin an tel lo. He meeting-ah hian Lalthangliana Murray chuan Selam khawtlang an tel thei lo chu pawi a tih thu sawiin meeting erawh chu a thlawn lovin sawihona hun tha tak an neih chu lawmawm a ti a. Mizoram Forest Act dan angin Mizoram chhunga thingkung ding reng rengte hi chu sawrkar ta vek a ni a, mahni khua atanga khawdanga ken chhuah hi danin a phal lo a, mipuiten kan mamawhna avanga thing kan lak thinah hian Forest Department hi a nazawngah a inrawlh lo a, hriathiamna a nei thui hle a, chutih rualin Mizoram thing leh mau, ramsate an chereu nasa lutuk tur venhimna atan chuan Dan anga chet a ngaih thin thu sawiin Forest Department hmalakna hrang hrang report a pe nghal bawk. Murray-a chuan Selam thil thleng chungchang chingfel tur hian sawrkar leh police ni lovin court rorelna a ni tawh a, court zahawmna palzutin sawrkar ava inrawlh ngawt a thiang lova, state sawrkarin a thu thuin court a va nawr thei lo a ni a ti a, an resolution siam anga mi 14 te case tihtawp hi sawrkar pawhin a theih loh thu a sawi. Inkhawm kaihruaitu Zoengsanga, Addl. DC Champhai chuan dawhkan kila zawldawh taka sawiho leh inbiakpui tum laia Selam lam an lo kal si lohah chuan India khua leh tui kan nih tlan vek avangin hma lak ho dan tur ngaihtuah ho a tul a ni tiin mahni thiamthu emaw midang thiamlohna emaw ringawt changchawi lovin inremna tha tak a awm theih dan tur kawng zawn nise a ti a, thu ti punlun thei zawng leh thu veivir thinte laka fimkhur a ngaih thu a sawi bawk.