Aizawl April 20, 2023 : Mizo Hmeichhe Insuihkhawm Pawl, Chawlhhmun Branch chuan thuchhuah siamin Ni 16.04.2023 (Sunday) zana an member Remsangpuii chunga Laldingngheta chet dân chu an dem thu an tarlang a, hetianga hmeichhe lakah chetna hi thleng tawh lo se an ti a, Remsangpuii inenkawlna senso tum sak turin an phut bawk.

Chawlhhmun MHIP chuan, "Kan hmeichhiatpui leh kan member tawrhna hi kan tuarpuiin kan rilru a na takzet a ni tih Mizoram mipui ten min hriatsak kan duh a. Hetianga râwng taka chêtna hi tu chungah mah thleng tawh lo se kan duh a ni," an ti.

Chawlhhmun MHIP chuan, "Laldingngheta S/o Thangdela (L) hi a thil tihsualah a phû tawk a na taka hremna pek ni rawh se. Hmeichhe chaklo leh âwmnem zawkte chunga râwng taka chet hmang hi kan veng a awm atân kan duhlo.  Remsangpuii inenkawlna senso hi pawi khawihtu /chhungten tum sak vek rawh se," tiin an thuchhuah siamah hian an tarlang bawk.