Indian nulate chuan FIH Hockey Olympic Qualifiers 2024 khelh mekah pool match hnuhnung berah 5-1-a Italy hnehin semifinal an inhlang kai ta a. An tum ber thleng turin pen khat pen chiah a ngai ta.

Marang Gomke Jaipal Singh Astroturf Hockey Stadium, Ranchi, Jharkhand-a Pool B inkhel hnuhnung berah hian Udita (1’, 55’), Deepika (41’), Salima Tete (45’) leh Navneet Kaur (53’) ten goal thunin Italy tan Camila Machin (60’) chuan si khat a sut ve bawk.

Inkhelh hmasak bera USA an hneh loh tuma inkhel bul tan lo, Lalremsiami Hmarzote pawhin New Zealand an hneh tuma bul a tan hnuah Thawhlehni zanah pawh bul a tan leh a. An goal hnihna chu a thawh chhuah niin Sofia Laurito-in a tihtluk avangin penalty stroke a hlawh a, Deepika-i’n a vaw lut a ni.

Mizo nula telna India team hian USA phak lovin an pool-ah pahnihna ni mah se semi-final an lut phak ta tho va, final an luh chuan Paris Olympics-ah an inlan thei ang.

Ranchi-a inelna kal mekah hian a ti tha pathumte chu July-August-a neih tur Paris 2024 Olympics-ah an inlan thei dawn a, Indian hmeichhe team hi a ti tha pali zingah an tel ta phawt tihna a ni.

India hian Pool A-a a sang ber, World No. 5 Germany chu Ninganiah semi-final-ah an hmachhawn dawn a. German nulate lakah hian an chak a nih phawt chuan Paris 2024-ah an inlan thei dawn tih a chiang ang a, an tlawm a nih pawhin pathumna inchuhna inkhel an la hmabak dawn a, an chak chuan France khawpui hi an pan thei tho ang.