Mizo ten film star kan neih lar zinga mi K. Lalremthanga chu film industry-ah a lo kir leh ta a, a channa Nun Hi Eng Nge? tih chu zanin atangin Lersia Play app-ah en theihin a awm dawn ta. 

Remthanga hi lemchan khawvela Mizo te 'legend', ennawm hmuhnawm tak tak min hlui hmasa bertute zinga mi a ni. Hun rei tak a chawlh hnuah, a rawn come back leh ta a ni. Tun tuma a channa hi Kristian movie a ni dawn a, mahse, action leh romance lungrun tak a tel leh ngei dawn e! Mizote mit titlai a, min nuih tir a, velh loha min tah tir fo tawhtu kutchhuak thar ber hi en hmaih phal chi a ni lo. 

Amah bakah hian lemchan khawvela Mizo mi hmasa te - B. Lalthlengliana (Thangkura), Lalzidinga, Lalngaihsaka leh mi dangte pawh he film-ah hian hmuh tur an awm leh dawn a ni. Main role play tur Remthanga hi tunah chuan rawngbawltu pastor a ni tawh a, film pawh hi hun chep tak kara a buaipui a ni. Director a nih bakah, main character a play a, piantharna ni lo mah se ringtu nun kawngah hlawkna tam tak thlen theih a nih a beisei thu a sawi. 

He film hi kum 1994 bawr vela Mizorama chhungkaw pakhat chanchin behchhan (true story based) a siam a ni. Chutih lai chuan Mizorama chhungkaw nu ber pakhat chuan sum leh pai lama harsatna avangin a pasal leh fanau pawmlaite a kalsan a, mahse, a beisei ang a lo ni hauh lo! A thlen tum lei vanram chu hremhmun a lo ni zawk a; chhanchhuah ngaiin a awm ta zawk si! Nung damin a haw thei ang em? Engtin nge ni zel dawn? Han en phawt mai teh ang!