A duhthusam tipuitling thei turin Lalrinchhana Sailo chuan amah daltu hnuhnung ber, Lalremtluanga a hneh a, Mizo palian inchai champion lai, Lalsangliana nen an intawng dawn.

LPS Arena, Falkland-ah Inter District Wrestling Championship khelh rualin Zirtawpni zanah champion cho tur zawnna hmawrbawk a ni a. North Vanlaiphai pa chak, kum 29 mi, Rinchhana’n thawh thum an inchai chhungin 7-2-in hma a hruai a. Thawh hnih dang la awm mah se Zobawk tlangval Remtluanga’n a dar a tinat avangin a khel zawm thei ta lo a ni.

Feet 5’11-a sang, kg 97-a rit, Rinchhana’n a vawi khat nan Palian title a chuh dawn a; kum 26 mi, Remtluanga lakah thiamna nei leh tharum ngah a nihna a lantir.

Palaihawl title kawltu, Remruatpuia, Saitual nena innuai turin Ngursangzuala’n fiahna hnuhnung a paltlang hram a, Serchhip tlangval, RB Lalthansanga nen thawh nga an inchai hnuah 2-1-in a chak.

Palaihawl title fight-ah Saitual inchai chak ve ve an intawng dawn a. Patê champion B Lalawmpuia, Thenzawl hmaa ding turin Saitual inchai chak tho, Lalchhanhima a tling a, amah ang bawka patê champion ni tawh, Bulfekzawl chhuantawlawl, Lalawmpui a hneh a ni.

Thawh nga an inbeih chhungin 1-1-in an inhneh tawk a, inbanphawi hmangin an ching fel a, a vawi khatnaah chak zawk an awm lo va, a tum hnihnaah a tlang a. A hmain title chuh tur zawnna semifinal-ah Chhanhima’n inbanphawi vawi hnihna hmangin Hmangaihzuala a hneh tawh bawk a ni.

Nulian champion Hmangaihsangi, Dilkhan nena inchai turin Lunglei nula, Zodinpuii’n chiang takin Lalsiamthari, East Lungdar a hneh a, vawi hnih bawhbetin 21-1-in a chak.

Nutê title chuh tur zawnnaah Kolasib nula, Lalnuntluangi’n chungnung takin Veronica Lalbeiseii a hneh bawk a. Vawi hnih a bawhbet bakah point 32 a thawk chhuak a, hliam vangin Tachhip nulain thawh lina a khel tluan thei lo.

Nulaihawl title chuh turin Champhai inchai chak, Peticost Lawmsangpuii chiah a inziak lut a, champion lai Elizabeth Rohlupuii, Melriat hmachhawn thei turin a tling nghal a ni.

Tlaiah sub-junior, junior leh senior huanga greco-roman style leh freestyle wrestling hmanga inelna inter district zawh fel a ni ve thung a. Inelna thlengtu, Aizawlin gold pakua, silver pariat, bronze pakua nen medal 26 an la a, a pum puiah an sang ber.

Ningani a zawh ruala hmahruaitu, Kolasib-in gold pakua tho dawng mah se, silver leh bronze panga ve ve lain medal 19 an thawk chhuak a, pahnihnaah tlahniamin championship an khar.

Pathumnaah ni hmasa ber, Nilainia hmahruaitu, Serchhip an awm a, gold pasarih leh silver paruk nen medal 20 an dawng a. A tawp lama hmasawn, Saitualin gold pasarih tho lain silver pali leh bronze panga an hawn a, Lungleiin gold pahnih lain Mamit leh Champhaiin pakhatna nihna an nei ve lo a ni.