Aizawl: Republic veng, Republic Vengthlang leh Upper Republic ten an thlanmual intawm hman nawn 'recycling' hna chu nimin khan thawh tan a ni a, veng pathum atang hian mi 300 vel thawkchhuakin mitthi ruhro thenkhat chu lachhuakin ft.3x2 biala siam ah phum nawn an ni. Thlanmual recycling hi thuang hnih a thawh tur a ni dawn a, thawhkhatna ah hian nikum lama ruahsurin thlan engemaw zat a tihchhiat chu chhawrdawh (terrace) anga siamin, lane 3 in thlan hi siam a ni a. Lane hnuai berah hian thlan 90, a dawtah thlan 60 leh a chung berah thlan 18-30 dah tum a ni a, heng terrace 3 ah hian a vaiin thlan 160-180 vel leng thei tura beisei a ni a, thawh khatna ah hian thlan 10 bawr vel sengluh tum a ni. Thawh hnihna hi chu thlanmual (Kawipui) step chhuk thla sirtawn ft 20 chin huamchhungah terrace siamin khawih leh a ni ang a, hei erawh hi chu nakin hnu lama khawih tum a ni. Ruahman dan chuan kum 1990 leh a hma lama inphum tawh, tunhnaia phum thuah loh te chu a upat dan indawtin phawrh hmasak zel tur a ni a, phawrh hmasak tur hi chhinchhiah zel a ni dawn a ni. Tuna thlanmual recycling hi kalpui theih anih chuan kum reitak chhung chu thlanmual hi la hman leh theih a ni dawn a ni.