February 23,2023; February ni 18, 2023, zing dar 2:50 vel a Republic veng, SBI ATM gelatine hmanga beitu Emmanuel Lalbiakzauva (24) s/o PC. Chhuahkhama (L) Bawngthah khua, tun a Ramhlun North, Aizawl a khawsa mek chu police ten an man.

Vawiin chawhnu dar 1 khan Aizawl SP, C. Lalruaia chuan thuthar thehdarhtute kawmin, pawikhawihtu man a nih thu hi a puang a, Aizawl SP sawi danin, Republic Veng, SBI ATM bomb hmanga beih a nih chungchangah Special Investigation team din a ni a, ngawrh takin hnuchhui hna thawh a ni.

SIT te hnuchhuina kal zelah, pawikhawihtu hian a hma a alo chet tawh dan ang chiahin, Saikhamakawn SBI ATM ah hnuhma a nei tih an hmuchhuak a, bomb erawh a tipuak lo. CCTV atanga a chet vel dan an chhuizuina ah, Republic veng ATM a pawikhawihtu tho ni ngeiin an hria a, an chhuina kal zelah a chet velna hnuhnung ber chu Ramhlun bawr vel a nih vangin, chak takin an umzui a, Ramhlun North ah chhuiluh niin, nimin, February ni 22 khan bike a a kal chhuak leh tur chu man a ni.

Hemi hnu hian pawikhawihtu a ni ngei em tih chhuizui nghal ni bawkin, Republic veng a pawi a khawih lai a a bike khalh atangte, a thawmhnaw hak atangte leh a hmaikawr atangte in amah ngei a ni tih finfiah a ni a.

Republic veng, SBI ATM bomb hmanga a beih lai a a thawmhnaw hak te hmuhlet niin, a hmaikawr tichhia a a lo paih tawh pawh hmuhlet a ni a, hmaikawr dang a lo siam leh tawh a. Nimin man a nih lai hian gelatine an man sak tel bawk a, a bike kawl pawh hi Kulikawn atanga a ruk chhuah a ni.

Aizawl SP chuan thu an zawhfiahna atangin pawikhawihtu hian SBI ATM ngawr ngawr a bitum a, Emmanuel Lalbiakzauva hian SBI ah loan a dil a, a hmuh theih loh avangin SBI ATM hi a bitum zui ta niin a sawi. "Nimin ah khan man lo i la chuan nizan vel ah SBI ATM ah bomb a puak leh ngeiin a rinawm," Aizawl SP chuan a ti.   

Emmanuel Lalbiakzauva hi college kal thin, zirchhuak ta lo a ni a, a rem rem thawk a inhlawhfa thin niin, Ramhlun North a R. Lalthlamuana building ah a farnu nen a khawsa an ni.