ZALEN August 26, 2025: Lawngtlai bul lawka awm, Mampui Branch YLA te chuan, an khaw chhehvel Kilometres 4 huam chhung chu 'Reserve Area' atan an puang tih thuchhhuah siamin, hemi huam chhunga awm ramsa, lui lama khawsa nungchate leh thing leh mau eng chi mah lak leh khawih phal a niloh thu an puang.

Mâmpui Branch YLA te thuchhhuah a tarlan a nih danin, an khaw bul hnai ramngaw kilometres 4 huam chu khauh taka humhalh leh venhim hnathawh kal pui a nih thu an tarlang a. 'Reserved Area' huam chhungah hian khualkhua leh khaw chhung mi tu tan pawh ramvah, luikal leh chakraw lak khap a nih thu thuchhhuah an siamah hian an tarlang a. 

Nungcha leh ramngaw tih chereuna hmanrua chi hrang hrang Silai, Sairawkherh, Chainshaw, Dynamo, Chinai, Bleaching powder, ram kal nana hman lirtheite leh a dangte an in man sak a nih chuan a ṭul anga hma lak a nih tur thu leh, pawisa chawi tir an nih tur thu tarlang bawkin, Lawngtlai khawpui chhung leh a chhehvel aṭanga Mampui rama chetla thinte hnenah an thuchhhuah chu zah sak turin Mampui Branch YLA te chuan ngenna an siam bawk.

#ZalenNews