Aizawl: Mizoram Cultivator and Labour Union (MICLUN) chuan mirethei chenna inah hnamdang khungkhawm a, inchimralna a thlen mai an hlau tih an sawi. Nimin chhun khan Aizawl Press Club-ah chanchinbumite kawmin MICLUN President KC Lalliana chuan Aizawl khawpui daifema mirethei chenna in tur sawrkarin a siamah hnamdang (non Mizo) diltu an tam nia sawiin heng hmun te hi non Mizo hmunpui ah siam an hlau hle tih a sawi a. "Mirethei tana insak te hi Mizo zinga retheite tan reserve a, dan felfai leh changtlung tak siam vat turin sawrkar kan phut a ni," a ti. MICLUN hruaitute chuan inluah tur diltu te chu ni 26.1.1950 hma atanga Mizorama cheng tawhte ni ngei se an duh tih an sawi a. Tunah hian Mizo nilo diltu thahnem tak an awm nia sawiin non Mizo tam tak khungna hmun a ni ang tih an hlauh thu an sawi bawk. Mizoram sawrkar chuan mirethei te chenna atan hian Chite-Lawipu ah chhungkaw 408 chenna tur, Rangvamual-Edenthar ah in 368 leh Durtlang ah chhungkaw 320 chenna tur in a sa nia sawiin tunah hian Lawipu ah chhungkaw 40 chuang an khawsa tawh a, heng mite hian tui connection an neihloh avang leh an chenna hmun chu a tet em avangin harsatna an tawk niin MICLUN hruaitute chuan Press mite an hrilh bawk.