Mizote kan vanneihna chu hnam khat, tawng khat hmang, kristian zaa za kan nih mai paih lamah Kohhran nung tak kan nei hi a ni. Kohhran thuchhuak a nih tawh chuan mipui nawlpui hian kan la ngai pawimawh viau mai. Ram hruaitu leh political party-te pawh hian Kohhran duh dan hi an la ngai pawimawh khawp mai. Kohhran pawi sawi lah an hlau. A chang phei chuan Kohhran hi an vengthawng lutuk mah mah em aw tih mai tur a ni.

Mi nawlpui hian Pathian ram thil pek te, sawma pakhat pek te hi kan la ngai pawimawh viau mai. Member ngah ber, Presbyterian Kohhran kum khat sum lak luh pawh a tam tham fu mai. Kum 2020-2021 chhunga Mizoram Presbyterian Kohhran budget chu cheng vaibelchhe 360 chuang a ni. Ramthar lama kan hmalaknate pawh a ropui. Missionary nise kan tir chhuak hnem, a lawmawm khawp mai. Mi thenkhat chuan mihring tam dan atanga tehin khawvelah Mizo Kristiante hi missionary tir chhuak hnem ber kan ni an ti. Thil lawmawm tak a ni.

Ramthar rawngbawlna lamah huang kan zauh a, kan thawhlawmte a pun thur thur lai hian rethei dawm kan kawngah hian Kohhran hian tun aia nasa zawk hian hma la se kan ti em? BPL baseline survey hnuhnung berin a tarlan danin Mizoramah chhungkaw 56,584 zet hi BPL family kan ni a, chu chu 19.63% zet a ni. Missionary sang tel fe kan tirh chhuah mek lai hian kan ram chhung ngeiah mi nuai hnih dawn hi mi rethei (BPL) an la awm a nih chu. Tunah Covid-19 hri leng vangin eizawn hrang hrang a chawl thuap a, ni tin ei chawp dapten an taur nasa zual dawn niin a lang. Thla khat chuang kan inkharkhip (lockdown) vanga eizawnna hna a chawlh thuap avang hian mi thiamte chuan kan ram chhunga mi rethei (BPL) hi a let zeta pung turah an ngai bawk.

Kohhran din chhan pawimawh tak chu Lal Isua hnathawh chhunzawm a ni a, Lal Isua’n a ngaih pawimawh ber pakhat chu retheite hmangaiha an phurrit phurh pui a ni. Kohhran hian Krista hnathawh kan chhunzawm dawn a nih chuan retheite kan hlamchhiah thiang lo ang. Tunah hian khawpuiah mihring kan pung chak em em a, thingtlang atanga khawpuia pem lut tam tak hi retheihna avanga pem lut an ni a, ni tin inhlawhfaa ei chawp dapin an khawsa hram hram a ni. Khawpuia pem lut tam tak hi an dinhmun a tha chuang reng reng lo. Rev Dr Zaihmingthanga hian Aizawl khawpuia bial a vawn tuma a thusawi pakhat ka hre reng mai, “Bial ka han fang a, mi inhnuai kilkhawr tak tak thlengin ka luh chhuak a, Aizawl veng changkang takah pawh hian rethei hi kan lo va tam ve aw,” a ti vang vang mai.

Thingtlang kuthnathawkte hian an thlai tharte hi man man takin hralh thei zel se, khawpuiah an pem lut duh kher lo ang. An thawhrim ang zela hlawkna an tel dawn phawt chuan tuna khawpuia pem lut tam tak, dinhmun tha chuang si lote hi thingtlangah an let leh duh ngei ngei ang. Chuvangin, Kohhran hian liantham deuh takin rethei dawmkan kawngah hian hma la se a duhawm ngawt mai. Sawrkar tih tura dah hlawm tawp mai hi thil fuh ber pawh a ni lo mai thei. Kum khat chhunga Kohhran hrang hrangin kan thawhlawm tlingkhawm hi vaibelchhe 500 chuang zan a nih a rinawm a, heta tanga zaa sawm tal hi rethei dawm kan nan te, kut hnathawkte thlai thar lei nan dah phal ila, thil tih âwm loh tak a ni dawn em ni? Zaa sawm tlingkhawm chu nuai 5000 zet a ni dawn a, chhungkaw sang tel dawmkanna tham a ni. Heti zawnga Kohhranin hma a lak chuan kum reilo te chhungin kan ram hi rethei (BPL) awm lohnaah kan siam thei mai ang. Kristian state nih leh rethei awm lohna state nih hi a inhmeh em em a ni. Taksa, rilru leh thlarau hi a inzawm tlat a, taksa (tisa) thila kan pachhiat viau chuan kan thlarau nun thlengin a nghawng thei dawn a lo ni.

Chuvangin, kan Biak inte tha tual tualin, ropui tual tual mah se mipui nawlpui dinhmun a that chuan si loh chuan engtikah mah kan ram hi ram nuam a ni thei ngai lo ang. Ram changkangah chuan mipui nawlpui khawsak phung leh an ram hruaitute khawsak phung hi chuti takin a inthlau lo an ti. USA-ah chuan an President ei ang kha mipui nawlpuiin an eiin an in pha a, a thuam inbel ang chu mi vangtlangin an inbel pha tlat. Kan ramah chuan kan mi hausate leh rethei te chenna in hi a in ropui hleih em a, kan ei leh in a inthlau em a, kan thuam inbel nise a into hleih nasa mai si a. Rethei tamna rama hausa fal bik nih hi nawm pawh a nuam hrep lo ang.

Ramthar rawngbawlna a tha e, ringlo mi ringtua siam tum pawh a tha. Chutih rualin kan rawngbawlna hian kan ram chhunga retheite hi thlawh khum lo se, Kohhran hian rethei te dawm kang zawnga kan rawngbawlna kan her rem hi a tul khawp mai. Missionary sang tel thawn chhuak chung sia chhungkaw sing tel BPL family neih tlat mai hi thil inhmeh lo tak a ni.

K. Lalrinchhana