ZALEN November 16, 2025: Land Revenue & Settlement department-in stamp duty 1% atanga 3%-ah a tihsan hnuin sum hmuh a pung nasa tih an minister-in a sawi.

Tun hnaia Land Revenue & Settlement Minister B.Lalchhanzova leh MJA hruaitute inkawmnaah he thu hi sawi niin department hotute chuan stamp duty 3%-a tihsan a nih hnuah sum hmuh a pung nasa hle a, kumin quarter hnih hman zawh tak atanga sum hmuh hian nikum chhunga sum hmuh zawng zawng chu vaibelchhe 2 velin a la pha lo a. Quarter hnih dang a kal leh chuan nasa takin nikum lama sum hmuh hi khum ngei an beisei tih an sawi.

Thawktute chuan kuminah hian hnathawhna atan CM Land Reform package atangin sawrkarin cheng vaibelchhe 5 a pe tih sawiin an duhthusam ni lo mah se hemi sum hmang hian nasa takin hnathawh an tum tih an sawi. 

Sawrkar tharin ruahmanna thar a siam, e-Ram hmangin surveyor atanga minister thlengin a duh tan mahni file awmna hmun leh an kawl rei chhung an hre thei tawh tih sawiin mi tam takin an hmang tangkai tih an sawi a. Sawrkar tan pawh file kawl rei theih a ni lo tih sawiin file bo thlau pawh a awm dawn lo niin an sawi bawk.