ZALEN December 12, 2024 : Vawiin khan Lok Sabha MP Richard Vanlalhmangaiha chuan Parliament House Winter Session neih mekah thu sawiin Manipur buaina chungchangah Sawrkar laipui chu remna palai ah tanga community pahnihte dawhkan khat kilpuia an harsatna chinfel dan tur sawipui turin a phut thu a sawi.

Mizoram Lok Sabha MP chuan,"Sawrkarin laipuiin kan unau Zohnahthlak Myanmar, Bangladesh leh Manipur buaina avanga mizorama ral tlante tan chhawmdawlna sum leh pai thahnem tak Mizoram Sawrkar hnena a pek avangin thinlung takin lawm thu ka sawi a, chutih rualin Manipur buaina hian a awh rei ta hle a, mi 200 chuang zetin nuna hlu tak an chan tawh a, mi Sing nga (50000) chuangin In leh lo an chan tawh bakah Kristiante Biak In 300 chuang zet hal a ni tawh bawk a, Sawrkar laipui tan mahni ram chhung ngeia buaina thleng hi a chinfel dan ngaihtuah a hun ta hle a ni."

"Pathianin nunna hlu tak min pek hi kan zah tur a ni a, he buaina chinfel dan kawng tha zawk ngaihtuah thuai a nih loh chuan nunna tam zawk kan chan belh zel dawn a niin a lang. Tun dinhmunah hian Sawrkar laipuiin Paramilitary Force tam tak pawh tir lut mah se, heng community pahnihte inkara inremna a awm chuan si loh chuan an harsatna hi sut kian tak tak a nih a rinawm chuang lo a, chuvangin Central Sawrkarin Community pahnihte Dawhkan pakhat kilpuia an harsatna sutkian dan tur sawipuia remna palaia tang turin ka phut a ni," a ti.

Manipur buaina chungchangah hian Lok Sabha MP Richard Vanlalhmangaiha hian a ngaihdan leh dinna sawi tura zawhna vawi engemaw zat a lo dawng tawh a, nimahsela a sawina hmun tur platform dik taka Manipur buaina chungchang auchhuahpui hi a finthlak bera a hriat avangin Lok Sabha Parliament House Winter Session ah a au chhuak ta niin a sawi.