Barbadian singer Rihanna chuan kum ruk chhunga a hmasa ber a tan single a tichhuak ve leh ta, a hla thar hi 'Lift Me Up' tih a ni a, Zirtawpni khan a tichhuak. He hla hi Hollywood film chhuak thar 'Black Panther: Wakanda Forever' a an soundtrack a ni nghe nghe.

Black Panther: Wakanda Forever hi October 26 khan Dolby Theatre-ah premiere a ni a, hemi tum hian Rihanna leh a kawppui ASAP Rocky pawh an inlan. He film hi November 11 khian mipui nawlpui en theih tura tlangzarh a ni dawn a, Rihanna hla thar 'Lift Me Up' nen hian a lar chho viauin a rinawm. American film director Ryan Coogler chuan Rihanna hi fakin, Black Panther : Wakanda Forever tana a hnathawh chu famta Chadwick Boseman chawimawihna a nih thu a tarlang bawk.

American actor Chadwick Boseman hi August 2020 khan a boral a, Black Panther chhuak thar tur hian hriat chhuah a ni fo dawn niin a lang - mi tlemte tana an premiere tum pawh hian a chanchin vawi eng emaw zat sawi lan a ni. Rihanna hian rimawi khawvelah hun eng emaw che chu thawm nei mang loin hun a hmang tawh a, tun hnai khan a rawn kir leh thu a puang. A sawi atanga ni tam pawh a liam hmain single arawn tichhuak zui a, fans lam pawh an phur khawp ang le.

Kum 2016 khan 'Anti' album a tichhuak a, hemi hnu hian a reh zui ta vang vang a ni. Kum 34 mi Rihanna hian nakkum February-a neih tur Super Bowl Halftime Show-ah headline a chang dawn a, rimawi khawvelah thawm a rawn nei chho leh dawn. Hetih rual hian tun hnai khan rapper A$AP Rocky lakah fapa a hring a, duh ang thal chuan a la kalsan thei lo mai thei.