Aizawl; Chief Minister Lal Thanhawla chuan chhim lamah kan awm vang emaw hmar lama kan awm vang emaw hian ram kilkhawra awm anga inngaihna rilru kan pu tur a ni lova; Mizoram neitu kan nihna a dang chuang lo va, kan chanvo leh mawhphurna pawh a in ang vek a ni, a ti. Chief Minister hian nimin khan MADC complex, Saiha-ah Mara Autonomous District Council (MADC) a sorkarna kalpui mek ten kum hnih an tlin lawmna programme an buatsaih a hmanpui naah he thu hi a sawi a. Mipui ten an tawiawm loh chuan sorkarin ram hmasawnna kawng sial tur leh a chhelaite siamtha turin amah chauhvin a kal thei lo tih a sawi a. Mara ram mipuite chu Mara ram tihmasawn tur leh a chhe laite siamtha turin rinawmna, taimakna leh Pathian tihna nena eng party nge sorkarna siam tihah buai loa tawiawm tlat thin turin a chah bawk. EVM kaihhnawih thuthang lengvel chungchang sawiin, 'Dawt hian ke a nei lo va, reilote-ah a tlu leh mai thin a ni," Chief Minister chuan a ti a. "Mizoram kristian te hian missionary hna hi mihring chungah chauh emaw thawh tur ka ti thin a. Tunah chuan Pathian thilsiam dang ramsa, sava, luisa, thing leh mau leh ramngawte chungah hian kan missionary a tul tawh tak zet a, chuti lo chuan reilote-ah an chereu mai dawn a ni," a ti. Chief Minister hian Zirtawpni khan Myanmar ram chhung Salachhuah khuaa a kal tumin Lawngtlai a chhuahsan a, mahse khua in a bumro tak avangin Salachhuah hi thleng lovin Vahaiah a tawp rih a, Vahaiah hian khawtlang mipui ten ropui takin an lo hmuak a ni. Khuain a zir a nih chuan naktuk hian Myanmar ram chhung tho Vuangtu panin a chhuak ang. Salachhuah leh Vuangtu khua leh an chhehvel mipui tangrualten Chief Minister hi chawimawina hlan an tum a, chumi hun hmanpui tur chuan Chief Minister hian heng khaw pahnihte hi tlawh a tum a ni.