Aizawl; Volunteers for Community Mental Health (VOLCOMH) hruaitute chuan Mizoram ah rilru lama harsatna thleng a tam tih sawiin heng harsatna neite hian mithiamte pan nachang hre thin se an duh tih an sawi. Nimin khan Aizawl Press Club ah VOLCOMH hruaitute chuan World Mental Health Day (Oct.10,2014) lo thleng tur thlirin chanchinbumite nen inkawmhona an nei a, he hun kaihruaitu VOLCOMH Secretary Dr. Zoengpari chuan, "Mizo mipui ten chhul thalo, setana bia, rilru hah leh thildang tam tak kan tih te hi rilru hrisello te an nih theih fo thin avangin mi-thiam ten an enkawl a, kawng dik an zawh leh theih nan an tanpui thei a. Chuvangin mi-thiamte kan rawn leh pan fo a tul a ni," a ti. VOLCOMH hruaitu te chuan hnam nun (culture) inthlak leh ngaihsan zawng dik tawklo (value system tlahniam) in rilru hrisello a siam nasa nia an hriat thu an sawi bawk a. Tunlaia rilru hah (depression) a tam chhan chu hmasawnna kentel nia an hriat thu sawiin, "rilru a hmanhmawh a, kan nghak hman thin lo a, hei hian beidawnna khur ah min hnuklut thin a ni," an ti. VOLCOMH hruaitute chuan 'Midang nena inlaichinna tha neih chu damna pawimawh ber' niin an sawi bawk. VOLCOMH hian Central YMA building ah office neiin Thawhtan, Nilai leh Zirtawp tlai dar 1 atanga dar 5 inkarah mithiam an thu thin a, harsatna nei tan a pan theih reng niin an sawi bawk.