Aizawl; Mizoram Legislative Assembly Speaker Lalrinliana Sailo chuan 'intihhmingchhiatna' (Defamation case) file a tum lo tih ZALEN hrilhin, hetihlai hian Mizoram Lokayukta Chairman C. Lalsawta chuan Ngaizawl khaw kawng siamna a Assembly speaker Lalrinliana Sailo-in cheng nuai 100 a la nia sawi chungchang chu PWD ah hnathawh kalphung kimchang an dil dawn tih sawiin, chumi a zirin thubuai kalpui dan tur ngaihtuah a ni dawn tih a sawi.

ZALEN in a biakna ah Speaker Lalrinliana Sailo chuan dikna chu Pathianin a hria tih ZALEN hrilhin, audio voice record-a a hming lang chungchangah defamation case file tul a tih loh thu leh a tum loh thu sawiin, Pathianin rem a tih chuan hun remchangah hemi chungchangah hiah press conference neih a la tum thu a sawi bawk.

Ngaizawl khaw kawng siamnaah Assembly speaker Lalrinliana Sailo-in cheng nuai 100 a la nia sawi chungchang chhui turin ZPM party chuan February 23, 2022 khan Lokayukta-ah ngenna an thehlut a. Hemi chung-changah hian ZALEN zawhna chhangin Lokayukta Chairman chuan a changtu PWD ah detail information (project cost, DPR siam dan, tender chungchang etc.) an dil tur thu leh chu chu an zirchian hnuah thubuai kalpui dan tur an la ngaihtuah dawn thu a sawi.

Lokayukta a thubuai thehluttu ZPM chuan, "Legislative Assembly speaker Pu Lalrinliana Sailo chu tun hnaia Ngaizawl NGO Coordination Committee leh VC thuchhuah te, Ngaizawl khawtlang hruaitute leh Pi Coleen Lalsangpuii leh a manager-te inkawmhona audio voice record atang-in PMGSY kawng siam hnaah dan kalhin a inhnamhnawih ngei nia hriain, chhui chiang tura ngenna Lokayukta-ah kan thehlut. Lehkha hi Pu C. Lalsawta, chairperson, Mizoram Lokayukta-in a lo dawng a ni," an ti.

Lalrinliana Sailo chuan puh a nihna chungchangah hian Pathian khawngaihnain mi pawisa naia khat mah a la lo tih Assembly session neih mekah a lo sawi tawh a ni.