Aizawl: Tuichang bialtu MLA Lalrinliana Sailo chuan Khawzawl bial mipuite duh ber District pek a nihloh avangin Congress party chhuahsan a, MLA atanga ban a tum tih a sawi.   Lalrinliana Sailo hian nimin chhun khan a bial mipuite thlahna hun, Khawzawl Vengthar Bazar Waiting Shed-ah a nei a, thu sawiin inthlan hnuhnung berah vote 3,000 vel laia chakin, Ministry-ah a awlthawng an nih tak bawk avangin a bial pawh a vil tha hle tih a sawi a, inthlang leh dawn pawh nise a inhuam reng tih a sawi a. “Ka bial mipuite duh ber, district function hi MNF party-in a tiam a, hei vang hian MNF candidate tur pawh a invawrh sang ta em em a ni,” a ti a. Chuvangin, haw a, Congress party chhuahsan bakah MLA atang pawha bân a tum tih a sawi bawk.   Lalrinliana Sailo hi Chalfilh bialah MNF ticket-in a ding dawn nia thudawn a ni.   Zalen palaiin a biaknaah Lalrinliana Sailo chuan, “Kum 15 ka lo bial ve tawh avangin ka lung a leng khawp mai a, mahse Congress Legislature Party-ah min telh tawh loh bakah ka aiawha ding tur an zawn tawh avangin kiang lo thei ka ni lo a ni,” a ti.   Zalen palaiin party dang zawm tum a neih leh neih loh chung-chang a zawhna chu a haw hunah a la ngaihtuah dawn thu a sawi bawk.