“Ka inringtawk tak zet. Eng pawh ti ila, tluan loh leh chingchivet lai chu a awm ziah, a bikin football-ah a ni zual.”

Hei hi zanina Southampton mikhual tur, Premier League hmahruaitu, Arsenal manager Mikel Arteta-a’n an inkhelh hmaa a sawi a ni.

Arsenal hian rei tak league-ah hma an hruai tawh a, an la hruai mek bawk a. Mahse, tun hnai inkhel vawi hnihah point li an hloh va, an hloh dan lah inang chiahin, Liverpool leh West Ham United lakah si hniha hma an hruai ve ve hnuah an insut zawhtir ve ve.

Hetih lai hian an hnuai chiahah Manchester City an chak tluang zel thung a, vawi rukah vawi ruk chak zawn tawhin an hnaih hret hret zel si a, London club hi an talbuai leh mai ringtu an tam hle.

Ni e, Gunners hian tun hnai kum eng emaw ti chhungin phur takin, rinkai ve tak ni phakin khel ve bawk thin mah se a tawpah chuan ‘season lehah’ tiin nomawi la lo bawkin an tluan leh thin a; heti chen hma an hruai tawh chunga mi tam tak rin an hlawh lo cheu pawh hi thil mak a ni lem lo vang.

Arteta pawhin hei hi a hria a, a tawng chhuak ta a, vawi hnih an hnehtawk tawhna atangin zanin hian Saints lakah chaka an kawng an her rem leh ngei a rin ngheh tlat thu a sawi a ni.

“I thlen tum chu eng pawh ni se, tluang purhin a thlen theih ngai loh. Chu chu i hria a chumi atan chuan i inbuatsaih thin. Tluang takin an kal dawn tih min hrilh avanga (Arsenal hi) kaihruai (coach) ka ni lo,” tiin an kawng zawh chu fuh lo lai a awm rih mai niin a sawi.

Arteta team hian Southampton an hneh chuan point sarihin City an tlansan dawn a, khelh hnihin an khel tam zawk dawn thung a. Nilainia an inhmachhawn zui ang a, Spanish manager inrintawkna hi fiahin a awm zui ang.