Aizawl: Hriphaw khua chuan Zirtawpni khan an khua a YMA din champha kum 75-na Platinum Jubilee an lawm a, Environment, Forest & Climate Change Minister Lalrinmawia Ralte chuan hmanpuiin YMA hmalakna a fak. Khuallian chuan, "YMA chu kan ram leh hnam humhalh tu, mitin huap pawl awmchhun, hnamzia chawinungtu, chhiatni thatnia tumah tihbik nei lova, Mizote min chawimawitu a ni," a ti a. YMA member te chu tlawmngaihna, aia upate zahthiam leh midangte tanpui thei tura a hun taka lungchhuak theitu ni zel turin a chah bawk. Hriphaw khua YMA Platinum Jubilèe hi January ni 11, 2017 zan atanga khan lawm tan a ni a, khawchhung tihfaini, Hlim zan, Lamthai Ni ten hun hman a lo ni tawh a ni a, a lawmna pui ber chu ni 13 January 2017 hian neih a ni a, Jubilee ruai ropui tak khawtlangin kilho a ni. Ni 15 January hian Jubilee mei det leh Jubilee kharna hun hman a ni ang. Hriphaw khua hi Mamit District khawthlang lam Assam ramri dep a awm a ni a, tunah hian YMA member mipa 153, Hmeichhia 89 awmin an vaiin member 242 an awm mek a ni.