Aizawl: Zoram People’s Movement (ZPM) Research Wing chuan, “Mizoram khaichhuak tur leh rin thu ngawt ni lo, zirchiannaa Zoram mipui kaihhruai hi kan tum a ni,” an ti.

Nimin khan Aizawl Press Club-ah chanchinbumite kawmin ZPM Research Wing hruaitute chuan Research Wing member-te chu university leh college-a zirtirtute, sumdawng te, entrepreneur te leh sawrkar hnathawk pension, an thawh laia rualawt em em thin an ni tih an sawi.

ZPM Research Wing secretary Dr. KC Malsawmzauva chuan, “Research Wing din chhan ber chu zirchianna hmanga mipui kaihhruai leh hmasawnna thlen a ni a. State kan nih hnuah kum 36 zet party pahnihten rin thuin Mizoram an hruai tawh a, manifesto pawh vote zawn nan an inziah thatsiak a. Chutianga party pahnihten kum tam tak Mizoram an lo hruai tawh avangin kan chhehvel state-ten min tlan pel nasa a. Chutiang dinhmun atanga Mizoram kaichhuak tur leh ‘rin thu’ ngawt ni lo, zirchianna hmanga Zoram mipuite kaihhruai an nih theih nan tih theih kan nei ve dah lo maw? tiin ZPM kan support ve ta a ni,” a ti.

Dr. KC Malsawmzauva chuan, "Kan policy ah hian thenkhat chu tih hlawhtlin nghal mai theih a awm rualin, thenkhat chu hun duh rei tur chi te a awm nual bawk a, a thena chu sawrkar hnua enzui ngai zel te pawh a awm a. Mizoram history-a la awm ngai lo research based policy nei awm chhun ZPM party te hi te vote vek turin Mizoram hmun hrang hranga mite kan sawm che u a ni," a ti bawk.

ZPM Research Wing ten an hmalakna tur an sawi hrang hrang te chu-

* Zirtirtu post hnawhkhah loh tam lutuk hi zirna tichhetu a ni a, zirtirtu hi pek tum a ni. Elementary school ah Mizo tawng uar a ni ang

* Central atanga lo kal Tar pension leh a dang te state in a tum ve thin tihpun a ni ang.

* Kuthnathawktute thlai thar a bikin Sawhthing, hmarchha, aieng leh hmunphiah te man man zawka hralh dan ngaihtuah a ni dawn a, road map mumal tak siam a ni tawh.

* Mau atangin bio ethanol siam tum a ni a. Mizoramin mau metric ton maktaduai 25 vel a neih hi tangkai taka hman tum a niin bio diesel pawh siam tum a ni.

* Kan rama kawng chhiat chhan hi a siam dan dik tawk loh vang a ni a, tlangram milin kawng tha zawk siam tum a ni.