Aizawl: Regional Institute of Paramedical & Nursing Sciences (RIPANS)-a Department of Pharmacy in zirchianna a neihah ‘Lalruanga Dawibur’ chu damdawia atan a him lo tih hmuhchhuah a ni. Dr. H Lalhlenmawia, Head of Department, Department of Pharmacy chuan Lalruanga Dawibur chu Mizote’n  zunthlum enkawl nan an hmang thin tih sawiin, “Zunthlum a tih hniam theihna tur dose dik kan siam chhin a, zunthlum pawh a tihniam ngei a, mahse thin ah bawk a siam ta tlat mai a, thin tana hlauhawm (liver toxicant) a ni tih kan hmuchhuak a ni," a ti. Damdawi dang te nena pawlh erawh chuan thin tana him siin zunthlum enkawl nan a hman theih a, research kal mek a ni a, a hmawr bawk anih hma chuan damdawia hman a him lo niin a sawi bawk. RIPANS-a Pharmacy Department hian National Medicinal Plants Board atanga sum lo kal hmangin Mizo te’n damdawi atana kan hman ramhmul damdawite zirchianna an nei a, tunah rih chuan Lalruanga Dawibur, Anpangthuam leh Maufim hlo te zir mek a ni a, zunthlum enkawl nana hman thin pahnih Anpangthuam leh Maufim hlo te pawh hian zunthlum a ti hniam a, Anpangthuam hi a him hle a hriat a nih laiin Maufim hlo bikah hian ni 20 hnuah sugar level a rawn sang leh thin tih hmuhchhuah a ni. Research hi thla ruk hnua zawh fel tura beisei a ni. Thak dam- dawia hman thin hnim-hnah chikhat pawh tunah hian ointment a siam mek a ni a. Aieng mum (tablet) te pawh siam a ni. Bekang eisual awm thin pawh enfiah thei turin Pharmacy Department te hi an inbuatsaih mek a, November atanga endik thei tura ruahmanna kalpui a ni. RIPANS hi Mizoram sawrkar pawhin Food and Drug Testing Laboratory ah a pawm  tih HOD chuan Zalen a hrilh a ni.