ZALEN, August 15, 2025: Huang chi thuma Mizoram State Level Weightlifting Championships neih zawh takah mipa pathumin Mizoram record thar an siam.

Mizoram Weightlifting Association (MWA) chuan Thawhlehni atanga Ningani chhung khan Ramhlun Sports Complex, Aizawla Mizoram State Sports Council (MSSC) Weightlifting Academy-ah Mizoram State Level Weightlifting Championships 6th Youth (Boys & Girls), 15th Junior (Men & Women) leh 20th Senior (Men & Women) a buatsaih a. Hetah hian Lalruatfela, David Zohmingmawia leh David Lalzawmliana te Mizoram record thar an siam a ni.

Bungzung tlangval, Ruatfela hian senior (men) kg 98 huangah nikum championships-a Silvan Beihrothatlo-a’n snatch-a kg 125 a chawi leh clean & jerk-a kg 157 chawia record a siam chu khumin snatch-ah kg 136 leh clean & jerk-ah kg 180 a chawi a, record thar a siam a, gold medal a la bawk.

MSSC team-a hminga chawi, kum 19 mi, Ruatfela hi National Centre of Excellence (NCOE), Patiala, Punjab-a awm mek a ni a.

Sports & Youth Services (SYS) hminga inlan, David Zohmingmawia hian senior (men) kg 110 chung lam huangah clean & jerk-ah kg 170 chawiin record thar a siam a. Ani bakah hian MSSC team hminga inlan, David Lalzawmdika chuan senior (men) kg 110 huangah clean & jerk-ah kg 170 chawiin record a siam bawk.

David-a te pahnih hi NCOE, Imphal, Manipur-a rit chawi zira awm lai mek ve ve an ni a, kum 16 mi ve ve chauh an ni.

He intihsiaknaah hian mipa lamah junior leh senior huangah Isak Malsawmtluanga (MSSC-NRC) chu best lifter atana thlan a. Kum 18 mi hi huang hnihah hian kg 65-ah inlanin gold medal a la ve ve a. Youth-ah kg 65 huanga gold medal latu, Laithanpuia (MSSC-NRC) chu best lifter atan thlan a ni bawk.

Hmeichhiaah youth, junior leh senior-ah kg 58 huanga inlan, Pricilla Biakremmawii (MSSC-NRC) chuan gold medal vek lain best lifter atan thlan a ni ve thung.

RESULT LANGSAR:

Team champion (women) - SYS

Runner's Up - MSSC-NRC

Team champion (men) - MSSC-NRC 

Runner's Up - SYS

Best lifter (women): 

Youth, Junior & Senior - Pricilla Biakremmawii (MSSC-NRC)

Best lifter (men):

Youth - Laithanpuia (MSSC-NRC)

Junior & Senior - Isak Malsawmtluanga (MSSC-NRC)