Aizawl: Union Environment, Forests & Climate change Minister Prakash Javadekar chuan riverined reserved forests huam chhunga ram neitute hnenah zangnadawmna (compensation) pek theih a ni lo tih Rajya Sabha MP Ronald Sapa Tlau zawhna chhangin a sawi. March ni 12,2015 (Ningani) kaltaa Mizoram MP, Ronald Sapa Tlau zawhna a chhan naah Union Forests Minister chuan Mizoram a lui 16- Tlawng, Tut, Teirei, Langkaih, Serlui, Chemlui, Tuivai, Tuivawl, Tuirini, Tuirial, Tuiruang, Khawthlangtuipui, Tuichawng, Kau, De leh Phairuang lui te chu lui atanga mel chanve huam chu riverined reserved forests ah puan a ni tiin hemi huam chhungah hian LSC leh periodic patta nei awm mah se Forest (Conservation) Act, 1980 angin zangnadawmna hi pek theih a ni lo tih a sawi. India khawpui ber New Delhi leh khawpui dang thenkhat boruak chu hriselna atan a him tawk leh him tawk loh a zawhna chhangin Union Minister chuan Delhi leh a chhehvel khawpui 5 te chu phal bak in a bawlhhlawh tih a sawi a. Boruak ti bawlhhlawh thei hrang hrang lakah khauh zawka state khawpui tin bakah khawpui lian zual ah boruak dinhmun enfiah tum a ni tih a sawi bawk.